ବଳଙ୍ଗାରେ ନାବାଳିକା ପୋଡ଼ିବା ଘଟଣାରେ ସାରା ରାଜ୍ୟରେ ଚର୍ଚ୍ଚା ଚାଲିଛି। ବାଲେଶ୍ୱର ପୀଡିତାଙ୍କ ମୃତ୍ୟୁ ଘଟଣା ପରେ ଏହା ଦ୍ୱିତୀୟ ଘଟଣା। ସବୁଠି ପ୍ରତିବାଦ ବଢ଼ୁଛି, ରାଜନୀତିକ ହଳଚଳ ମଧ୍ୟ ଦେଖାଯାଉଛି। ମହିଳା ସୁରକ୍ଷା ପ୍ରଶ୍ନରେ ବିରୋଧୀ ଦଳ ରାସ୍ତାକୁ ଓହ୍ଲାଇଛନ୍ତି । ଏହି ବିଷୟରେ ବିରୋଧୀ ଦଳର ନେତା ନବୀନ ପଟ୍ଟନାୟକ ସରକାରଙ୍କୁ କଡ଼ା ସମାଲୋଚନା କରିଛନ୍ତି।
ନାବାଳିକା ପୋଡ଼ିବା ଘଟଣାକୁ ନେଇ ନବୀନ ପଟ୍ଟନାୟକ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ସେ ସରକାରଙ୍କୁ ଟାର୍ଗେଟ କରି କହିଛନ୍ତି ଯେ, କେବଳ ଗୋଟିଏ ସପ୍ତାହରେ ଓଡ଼ିଶା ରେ ଦୁଇଟି ଭୟଙ୍କର ଘଟଣା ଘଟିଯାଇଛି। ପ୍ରତିଦିନ ମହିଳା ନିର୍ଯାତନା ସମ୍ବନ୍ଧୀୟ ଖବର ଆସୁଥିବା ସରକାରୀ ଅସମର୍ଥତାକୁ ପ୍ରମାଣ କରୁଛି ବୋଲି ସେ କହିଛନ୍ତି।
ନବୀନଙ୍କ ମତାନୁସାରେ, ଏହି ସରକାରରେ ଅପରାଧୀମାନେ କୌଣସି ଦଣ୍ଡ କୁ ଭୟ କରୁ ନାହାନ୍ତି। ସେହି କାରଣରୁ ଓଡ଼ିଶାରେ ମହିଳାମାନେ ଅସୁରକ୍ଷିତ ହୋଇଯାଇଛନ୍ତି।
ନବୀନ ପ୍ରଶ୍ନ କରିଛନ୍ତି, “ଏଭଳି ଘଟଣା ଆଗକୁ ନ ଘଟିବା ପାଇଁ ସରକାର କିଛି ନିଶ୍ଚିତ ଆଶ୍ୱାସନ ଦେବେ କି? କିମ୍ବା କୁମ୍ଭକର୍ଣ୍ଣ ନିଦ୍ରାରୁ ଉଠି, କେବେ ଦୃଢ଼ କାର୍ଯ୍ୟାନୁଷ୍ଠାନ ନେବେ?”
