ବେଙ୍ଗାଲୁରର କୋରାମଙ୍ଗଳ ଅଞ୍ଚଳରେ ଏକ ବହୁତଳବିଶିଷ୍ଟ ବ୍ୟାବସାୟିକ ଅଟ୍ଟାଳିକାରେ ନିଆଁ ଲାଗିଗଲା । ଅଟ୍ଟାଳିକାର ଉପର ମହଲାରେ ବିସ୍ଫୋରଣ ହେଲା ଏବଂ ପରେ ନିଆଁ ଚାରିଆଡକୁ ବ୍ୟାପିଗଲା । ରନ୍ଧନ ଗ୍ୟାସ ସିଲିଣ୍ଡର ଫାଟି ଏଭଳି ଅଗ୍ନିକାଣ୍ଡ ଘଟିଥିବା କୁହାଯାଉଛି । ତେବେ ସବୁଠୁ ଛାତି ଥରାଇ ଦେବା ଭଳି ଦୃଶ୍ୟ ହେଉଛି, ନିଆଁ ଲାଗିବା ପରେ ଜଣେ ବ୍ୟକ୍ତି ଜୀବନ ବଞ୍ଚେଇବା ପାଇଁ ଉପର ମହଲାରୁ ତଳକୁ ଡେଇଁ ପଡୁଥିବାର ଦୃଶ୍ୟ କ୍ୟାମେରାରେ କଏଦ ହୋଇଛି । ଦୁଇଜଣ ବ୍ୟକ୍ତି ଡେଇଁ ଗୁରୁତର ଆହତ ହୋଇଛନ୍ତି ଏବଂ ସେମାନଙ୍କୁ ଏକ ଘରୋଇ ହସପିଟାଲରେ ଭର୍ତ୍ତି କରାଯାଇଛି । ମିଳିଥିବା ସୂଚନା ଅନୁଯାୟୀ, ଚାରିମହଲା ବିଶିଷ୍ଟ କୋଠାର ଉପର ମହଲାରେ ଏକ କାଫେ ଚାଲିଥିଲା ଏବଂ ଅନେକଗୁଡିଏ ଗ୍ୟାସ ସିଲିଣ୍ଡର ମହଜୁଦ ଥିଲା । ପ୍ରତ୍ୟକ୍ଷଦର୍ଶୀଙ୍କ କହିବା କଥା ଗୋଟିକ ପରେ ଗୋଟିଏ ସିଲିଣ୍ଡର ବିସ୍ଫୋରଣ ହେବା ସହ ନିଆଁ ଚାରିଆଡକୁ ବ୍ୟାପିଯାଇଥିଲା ।ଆଠଟି ଅଗ୍ନିଶମବାହିନୀ ନିଆଁକୁ ଆୟତ୍ତ କରିବା କାର୍ଯ୍ୟରେ ଲାଗିଥିଲେ । ତେବେ ବିସ୍ଫୋରଣ ବେଳେ କାଫେରେ କୌଣସି ଗ୍ରାହକ ନ ଥିଲେ ।
