ତୁର୍କୀର ଇସ୍ତାନବୁଲ ସହରରେ ପାକିସ୍ତାନ ଏବଂ ତାଲିବାନ ନେତାଙ୍କ ମଧ୍ୟରେ ଶାନ୍ତି ଆଲୋଚନା ବିଫଳ ହୋଇଛି । ସେଥିପାଇଁ ଦୁଇ ଦେଶ ମଧ୍ୟରେ ଉତ୍ତେଜନା ବୃଦ୍ଧି ପାଇବାର ଆଶଙ୍କା ସୃଷ୍ଟି ହୋଇଛି। ଏହି ଆଲୋଚନା କାତାର ଏବଂ ତୁର୍କୀର ମଧ୍ୟସ୍ଥତାରେ କରାଯାଉଥିଲା। ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ କହିଛନ୍ତି ଯେ ଦୁଇ ଦେଶ ମଧ୍ୟରେ ସୀମା ସଂଘର୍ଷକୁ ରୋକିବା ପାଇଁ ଶାନ୍ତି ଆଲୋଚନା ବିଫଳ ହୋଇଛି। ତଥାପି, ଆଫଗାନିସ୍ତାନରୁ ଆକ୍ରମଣ ଆରମ୍ଭ ନହେବା ପର୍ଯ୍ୟନ୍ତ ଯୁଦ୍ଧବିରତି ଜାରି ରହିବ। ଖୱାଜା ଆସିଫ ପୂର୍ବରୁ କହିଥିଲେ ଯେ ଶାନ୍ତି ଆଲୋଚନା ଆଗକୁ ବଢ଼ିବା ପାଇଁ ତାଲିବାନକୁ ଆତଙ୍କବାଦ କାର୍ଯ୍ୟ ବନ୍ଦ କରିବାକୁ ପଡିବ। ଶୁକ୍ରବାର, ପାକିସ୍ତାନ ଆଫଗାନିସ୍ତାନ ସୀମାରୁ ଆତଙ୍କବାଦ କାର୍ଯ୍ୟ କରୁଥିବାର ପ୍ରମାଣ ତୁର୍କୀ ଏବଂ କାତାର ମଧ୍ୟସ୍ଥତାଙ୍କୁ ପ୍ରଦାନ କରିଥିଲା ଏବଂ ତାଲିବାନ ଶାସନ ଆତଙ୍କବାଦୀ ସଂଗଠନ ଉପରେ ଲଗାମ ଲଗାଇବାକୁ ଦାବି କରିଥିଲା। ପାକିସ୍ତାନ ଚେତାବନୀ ଦେଇଛି ଯେ ଯଦି ସୀମାପାର ଆତଙ୍କବାଦ ବନ୍ଦ ହେବ ନାହିଁ, ତେବେ ସଂଘର୍ଷ ଆହୁରି ତୀବ୍ର ହେବ। ସେ କହିଛି ଯେ ଟିଟିପି ଏବଂ ବିଏସ୍ଏ ଆଫଗାନିସ୍ତାନ ମାଟିରୁ ପାକିସ୍ତାନରେ ଅସ୍ଥିରତା ସୃଷ୍ଟି କରୁଛନ୍ତି। ପାକିସ୍ତାନର ସୁରକ୍ଷାମନ୍ତ୍ରୀ ଆସିଫ୍ କହିଛନ୍ତି ଯେ ସରକାର ଏହି ନିଷ୍କର୍ଷରେ ପହଞ୍ଚିଛି ଯେ ପାକିସ୍ତାନ ଓ ଆଫଗାନିସ୍ତାନ ମଧ୍ୟରେ ହୋଇଥିବା ଆଲୋଚନା ବିଫଳ ହୋଇଛି। ସୀମାପାର ଉତ୍ତେଜନା କମେଇବା ପାଇଁ ଆରମ୍ଭ ହୋଇଥିବା ଏହି ନୂତନ କୂଟନୈତିକ ପ୍ରୟାସ ଏବେ ଶେଷ ପର୍ଯ୍ୟାୟରେ ଭାଙ୍ଗିଯାଇଛି। ଅକ୍ଟୋବର ୯ ତାରିଖରେ କାବୁଲ ଏବଂ ପାକଟିକାରେ ହୋଇଥିବା ଦୁଇଟି ବିସ୍ଫୋରଣ ପରେ ହିଂସା ଆରମ୍ଭ ହୋଇଥିଲା। ଏହି ଘଟଣା ପାଇଁ ଆଫଗାନ ସରକାର ପାକିସ୍ତାନକୁ ଦାୟୀ କରିଥିଲା । ତଥାପି, ପାକିସ୍ତାନୀ ଅଧିକାରୀମାନେ ସେମାନଙ୍କ ସମ୍ପୃକ୍ତିକୁ ନିଶ୍ଚିତ କିମ୍ବା ଅସ୍ୱୀକାର କରିନାହାଁନ୍ତି। ଦୁଇପକ୍ଷ ମଧ୍ୟରୁ କେହି ମଧ୍ୟ ପ୍ରାରମ୍ଭିକ ବିସ୍ଫୋରଣରେ ମୃତାହତଙ୍କ ସଂଖ୍ୟା ବିଷୟରେ ଅଧିକ ବିବରଣୀ ଦେଇନାହାଁନ୍ତି।
