ଜୟନାରାୟଣ ମିଶ୍ରଙ୍କ ବିବାଦୀୟ ବୟାନକୁ ନେଇ ଅସନ୍ତୋଷ ଦାନା ବାନ୍ଧିବାରେ ଲାଗିଛି । ଦୀର୍ଘବର୍ଷ ଧରି ଶିଥିଳ ହୋଇଯାଇଥିବା କୋଶଳ ରାଜ୍ୟ ଦାବି ପ୍ରସଙ୍ଗ ଏବେ ଜୟନାରାୟଣଙ୍କ ବୟାନ ପରେ ପୁଣି ସତେଜ ହୋଇଛି । ବନ୍ଦୋ ଉତ୍କଳ ଜନନୀକୁ ବିରୋଧ କରିବା, ସରକାରୀ କାର୍ଯ୍ୟକ୍ରମରେ ବନ୍ଦେ ଉତ୍କଳ ଜନନୀ ଗାନ ବେଳେ ଛିଡା ନ ହୋଇ ଅସମ୍ମାନ ପ୍ରଦର୍ଶନ କରିବା ଓଡିଆ ଅସ୍ମିତା ଉପରେ ବଡ ପ୍ରଶ୍ନବାଚୀ ଠିଆ କରିଛି । ଯେଉଁ ଅସ୍ମିତା ପ୍ରସଙ୍ଗ ଉଠାଇ ବିଜେପି କ୍ଷମତାକୁ ଆସିଲା, ଏବେ ଜୟନାରାୟଣ ନିଜ ସ୍ବାର୍ଥ ହାସଲ ପାଇଁ ସେଇ ଅସ୍ମିତାକୁ ବଳୀ ପକାଇବାକୁ ପଛାଉନାହାଁନ୍ତି । ବିଜେପି ଓଢିଶାରେ କ୍ଷମତାସୀନ ହେବା ପରେ ପଶ୍ଚିମଓଡିଶାର ଅନେକ ବିଧାୟକ ଗୁରୁତ୍ବପୂର୍ଣ୍ଣ ପଦପଦବୀ ପାଇଛନ୍ତି । କନକ ବର୍ଦ୍ଧନ ସିଂହଦେଓଙ୍କୁ ମନ୍ତ୍ରୀମଣ୍ଡଳରେ ଉପମୁଖ୍ୟମନ୍ତ୍ରୀ କରାଯାଇଥିବା ବେଳେ ସୁରେଶ ପୂଜାରୀଙ୍କୁ ରାଜସ୍ବ ବିଭାଗ ଭଳି ଗୁରୁତ୍ବପୂର୍ଣ୍ଣ ପଦ ମିଳିଛି । ମାତ୍ର ନିଜକୁ ବରିଷ୍ଠ ଏବଂ ସବୁଠୁ ଅଧିକ ଯୋଗ୍ୟ ନେତା ବୋଲି ବିବେଚନା କରୁଥିବା ଜୟନାରାୟଣ ମିଶ୍ରଙ୍କୁ ପଦପଦବୀ ନ ମିଳିବା ତାଙ୍କ ପାଇଁ ଅପମାନ । ସେଥିପାଇଁ ନିଜ ସ୍ଥିତି ଜାହିର କରିବା ପାଇଁ ଜୟନାରାୟଣଙ୍କ ଭଳି ନେତା ନୂଆ ବାଟ ବାଛିଛନ୍ତି । ଏମିତି କୋଶଳ ରାଜ୍ୟ ଦାବି ପ୍ରସଙ୍ଗ ଉଠାଇ ନିଜକୁ ଚର୍ଚ୍ଚାରେ ରଖିବାକୁ ଉଦ୍ୟମ ଆରମ୍ଭ କରିଛନ୍ତି । ଯେତେବେଳେ ରାଜ୍ୟରେ ବିଜେଡି-ବିଜେପି ମେଣ୍ଟ ସରକାର ଥିଲା, ସେତେବେଳେ ଜୟନାରାୟଣ ନବୀନଙ୍କ ମନ୍ତ୍ରୀମଣ୍ଡଳରେ ମନ୍ତ୍ରୀ ହୋଇଥିଲେ । ସେତେବେଳେ କୋଶଳ ରାଜ୍ୟ ଗଠନ ଦାବିକୁ ସେ ସମର୍ଥନ କରୁ ନ ଥିଲେ । ଏପରିକି ବନ୍ଦେ ଉତ୍କଳ ଜନନୀ ସଙ୍ଗୀତ ଗାନକୁ ବିରୋଧ କରୁ ନ ଥିଲେ । ଏବେ ଜୟନାରାୟଣ ସରକାରରେ କୌଣସି ପଦପଦବୀରେ ନ ଥିବାରୁ ଓଡିଶା ବିଭାଜନ ଭଳି ଦାବି ଉଠାଇ ସମସ୍ତଙ୍କ ଦୃଷ୍ଟି ଆକର୍ଷଣ କରିବାକୁ ଚେଷ୍ଟା କରିବା ସହ ବିଜେପିକୁ ଅଡୁଆରେ ପକାଉଛନ୍ତି । ଜୟନାରାୟଣଙ୍କ ବିବାଦୀୟ ବୟାନ ଓ ଆଚରଣ ଏବେ ସରକାରଙ୍କୁ ସମାଲୋଚନା କରିବା ପାଇଁ ବିରୋଧୀଙ୍କୁ ଖୋରାକ୍ ଯୋଗାଇଛି । ଅବଶ୍ୟ ଏକଥା ସତ୍ୟ, ଯେତେବେଳେ ଯେଉଁ ପଶ୍ଚିମଓଡିଶା ନେତା ମନ୍ତ୍ରୀମଣ୍ଡଳରେ ଗୁରୁତ୍ବ ପାଆନ୍ତିନି, ସେତେବେଳେ ସେମାନେ ଏମିତି କୋସଳ ଡ୍ରାମା କରିଥାନ୍ତି ।
