ଦଶହରା ପାଇଁ ସହରଠୁ ଗାଁ ଯାଏଁ ବ୍ୟାପକ ପ୍ରସ୍ତୁତି । କୋଭିଡ କଟକଣା ଯୋଗୁ ଗତ ଦୁଇବର୍ଷ ଧରି ଶାରଦୀୟ ପୂଜା ଫିକା ପଡିଯାଇଥିଲା । ଚଳିତବର୍ଷ ଦଶହରା ଉତ୍ସବକୁ ପାଳନ କରିବା ପାଇଁ ସବୁଆଡେ ପ୍ରସ୍ତୁତି ଚାଲିଥିବା ବେଳେ ପାଣିପାଗ ବିଭାଗର ଖବର ଲୋକଙ୍କ ଦଶହରା ମଉଜକୁ ପାଣିଚିଆ କରିଦେଇଛି । ଆସନ୍ତାକାଲି ଶନିବାର ଠାରୁ ରାଜ୍ୟର ଉତ୍ତର ଉପକୂଳର କେତେକ ଅଞ୍ଚଳରେ ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ସେହିପରି ରବିବାର ଓ ସୋମବାର ଦିନ ମଧ୍ୟ ରାଜ୍ୟର ଉପକୂଳ ଓ ମଧ୍ୟମ ଜିଲ୍ଲାଗୁଡିକରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । 11 ଜିଲ୍ଲାକୁ ପାଣିପାଗ ବିଭାଗ ପକ୍ଷରୁ ୟେଲୋ ଓ୍ବାଣିଂ ଜାରି କରାଯାଇଛି ।
