ବିଧାନସଭାରେ ସଦସ୍ୟ ସଂଖ୍ୟା ମାତ୍ର 14 । ସ୍ଥିତି ଦୃଷ୍ଟିରୁ ରାଜ୍ୟରେ ତିନି ନମ୍ବର ରାଜନୈତିକ ଦଳ ଭାବେ ରହିଥିବା କଂଗ୍ରେସ ବିଧାନସଭାରେ ଓ ବିଧାନସଭା ବାହାରେ ଦମ୍ ଦେଖାଇଛି । ବିଧାନସଭା ଭିତରେ ଘଣ୍ଟ ପିଟି ପ୍ରତିବାଦ କରି ଦଳର ପ୍ରଥମେ 12 ଜଣ ଏବଂ ପରେ ଆଉ ଦୁଇଜଣ ବିଧାୟକଙ୍କୁ ସସପେଣ୍ଡ୍ ହେବାକୁ ପଡିଲା । ମାତ୍ର ଜିଦରୁ ଓହରି ନ ଥିଲା କଂଗ୍ରେସ । ବିଧାନସଭାରୁ ସସପେଣ୍ଡ ହେବା ପ୍ରତିବାଦରେ ଗୃହ ଭିତରେ ଧାରଣା ଦେବା ଏବଂ ମାର୍ଶାଲଙ୍କ ଦ୍ବାରା ବିତାଡିତ ହେବା ପରେ ବିଧାନସଭା ବାହାରେ ପ୍ରତିବାଦ କରି କଂଗ୍ରେସ ନିଜର ଦମ୍ ଦେଖାଇବା ସହ ଶକ୍ତ ବିରୋଧୀ ଦଳ ଭାବେ ନିଜର ଭୂମିକା ନିର୍ବାହ କରିଛି । ଅପରପକ୍ଷରେ ଗତ ବୁଧବାର ଦିନ କଂଗ୍ରେସ ବିଧାୟକଙ୍କୁ ସସପେଣ୍ଡ୍ କରାଯିବା ପ୍ରତିବାଦରେ ରାଜ୍ୟ ସରକାରଙ୍କୁ ତୀବ୍ର ସମାଲୋଚନା କରିଥିବା ବିଜେଡି ଗୁରୁବାର ଦିନ ୟୁ ଟର୍ଣ୍ଣ ନେଇ ଗୃହ କାର୍ଯ୍ୟରେ ସ୍ବାଭାବିକ ଭାବେ ଯୋଗଦେବା ସମସ୍ତଙ୍କୁ ଚକିତ କରିଛି । ଗୋଟି ପ୍ରମୁଖ ରାଜନୈତିକ ଦଳର ସମସ୍ତ ବିଧାୟକଙ୍କୁ ନିଲମ୍ବିତ କରିବା ରାଜ୍ୟ ସଂସଦୀୟ ଇତିହାସରେ କଳା ଅଧ୍ୟାୟ ବୋଲି ବିଭିନ୍ନ ରାଜନୈତିକ ଦଳ ନିନ୍ଦା କରିଛନ୍ତି । କିନ୍ତୁ ଏତେସବୁ ଘଟଣା ପରେ ବି ବିରୋଧୀ ଦଳ ନେତା ନବୀନ ପଟ୍ଟନାୟକ ନିରବ ରହିବା ରାଜ୍ୟ ସରକାରଙ୍କ ପ୍ରତି ବିଜେଡିର ଦୁର୍ବଳ ଆଭିମୁଖ୍ୟକୁ ପଦାରେ ପକାଇଦେଇଛି ।
