ନୂଆଦିଲ୍ଲୀ – ଆତଙ୍କବାଦକୁ ନେଇ ପାକିସ୍ତାନ ଉପରେ ଭାରତ ପ୍ରହାର କରିବା ପୂର୍ବରୁ ରଙ୍ଗ ଦେଖାଇବା ଆରମ୍ଭ କରିଦେଇଥିଲା ବାଂଲାଦେଶ । ଭାରତର ସାହାଯ୍ୟ, ସହଯୋଗକୁ ଭୁଲି ଧର୍ମ ଆଧାରରେ ପାକିସ୍ତାନକୁ ସମର୍ଥନ ଘୋଷଣା କରିଥିଲା । ଖାଲି ଘୋଷଣା ନୁହେଁ, ଭାରତ ପାକିସ୍ତାନ ଉପରେ ଆକ୍ରମଣ କଲେ ବାଂଲାଦେଶ ଭାରତ ଉପରେ ଆକ୍ରମଣ କରିବ ବୋଲି ଧମକ ଦେବାକୁ ବି ପଛେଇ ନ ଥିଲା । ପାକିସ୍ତାନ ଉପରେ ଭାରତର ପ୍ରଚଣ୍ଡ ଆକ୍ରମଣ ଦେଖି ବାଂଲାଦେଶ ଚୁପ୍ ହୋଇଯାଇଥିଲା । ମାତ୍ର ଏଭଳି ଦେଶକୁ ବୁଦ୍ଧି ଶିଖେଇବା ପାଇଁ ଭାରତ ଏବେ ଯେସାକୁ ତେସା ନୀତି ଆପଣେଇଛି । ବାଂଲାଦେଶ ବିରୋଧରେ ବାଣିଜ୍ୟିକ କଟକଣା ଲଗାଇଛି । ବାଂଲାଦେଶରୁ ସ୍ଥଳଭାଗରେ ଆସୁଥିବା ପୋଷାକ, ପ୍ରକ୍ରିୟାକୃତ ଖାଦ୍ୟ ଏବଂ ଅନ୍ୟାନ୍ୟ ସାମଗ୍ରୀ ଆମଦାନୀ ଉପରେ ପ୍ରତିବନ୍ଧକ ଲଗାଯାଇଛି । ବାଣିଜ୍ୟ ଏବଂ ଶିଳ୍ପ ମନ୍ତ୍ରଣାଳୟ ଅଧୀନସ୍ଥ ବୈଦେଶିକ ବାଣିଜ୍ୟ ମହାନିର୍ଦ୍ଦେଶାଳୟ ପକ୍ଷରୁ ଏହି ବିଜ୍ଞପ୍ତି ଜାରି କରି ବାଂଲାଦେଶରୁ ଭାରତକୁ ଆସୁଥିବା ସାମଗ୍ରୀ ଉପରେ କଟକଣା ଲଗାଯାଇଛି ।
ନିର୍ଦ୍ଦେଶ ଅନୁଯାୟୀ, ବାଂଲାଦେଶରୁ ସମସ୍ତ ପ୍ରକାରର ପ୍ରସ୍ତୁତ ପୋଷାକ ଆମଦାନୀକୁ ଅନୁମତି ଦିଆଯିବ ନାହିଁ । ବନ୍ଦର ମାଧ୍ୟମରେ ଆମଦାନୀ ଉପରେ ମଧ୍ୟ କଟକଣା ଲଗାଯାଇଛି ।
ସେହିପରି ଅନ୍ୟାନ୍ୟ ପ୍ରତିବନ୍ଧକଗୁଡ଼ିକ ହେଉଛି ଫଳ/ଫଳ ସ୍ୱାଦଯୁକ୍ତ ଏବଂ କାର୍ବୋନେଟେଡ ପାନୀୟ, ପ୍ରକ୍ରିୟାକୃତ ଖାଦ୍ୟ ସାମଗ୍ରୀ, କପା ଏବଂ କପା ସୂତା, ପ୍ଲାଷ୍ଟିକ୍ ଏବଂ ପିଭିସି ପ୍ରସ୍ତୁତ ସାମଗ୍ରୀ, ରଙ୍ଗ, କାଠ ଫର୍ଣ୍ଣିଚର ଓ ଅନ୍ୟାନ୍ୟ କଞ୍ଚାମାଲ । ଏହି ସାମଗ୍ରୀଗୁଡ଼ିକୁ “ଆସାମ, ମେଘାଳୟ, ତ୍ରିପୁରା ଏବଂ ମିଜୋରାମରେ କୌଣସି ଲ୍ୟାଣ୍ଡ କଷ୍ଟମ୍ସ ଷ୍ଟେସନ୍ (LCS)/ଇଣ୍ଟିଗ୍ରେଟେଡ୍ ଚେକ୍ ପୋଷ୍ଟ (ICP) ଏବଂ ପଶ୍ଚିମବଙ୍ଗର LCS ଚାଙ୍ଗରାବନ୍ଧା ଏବଂ ଫୁଲବାରୀ ମାଧ୍ୟମରେ ଅନୁମତି ଦିଆଯିବ ନାହିଁ । ବାଂଲାଦେଶରୁ ମାଛ, LPG, ଖାଇବା ତେଲ ଏବଂ ଚୂର୍ଣ୍ଣ ପଥର ଆମଦାନି ପାଇଁ ବନ୍ଦର ପ୍ରତିବନ୍ଧକ ପ୍ରଯୁଜ୍ୟ ନୁହେଁ ।
ବାଂଲାଦେଶ ସରକାର ଏପ୍ରିଲରେ ଜାତୀୟ ରାଜସ୍ୱ ବୋର୍ଡ (NBR) ଦ୍ୱାରା ଏକ ବିଜ୍ଞପ୍ତି ମାଧ୍ୟମରେ ସ୍ଥଳ ବନ୍ଦର ମାଧ୍ୟମରେ ଭାରତରୁ ଦେଶକୁ ସୂତା ଆମଦାନି ନିଷିଦ୍ଧ କରିବା ପରେ ଭାରତ ଏହି ପଦକ୍ଷେପ ନେଇଛି । ପୂର୍ବରୁ, ଭାରତ ବାଂଲାଦେଶ ପାଇଁ ଟ୍ରାନ୍ସ-ସିପମେଣ୍ଟ ସୁବିଧା ବନ୍ଦ କରିଦେଇଥିଲା, ଯାହା ପରବର୍ତ୍ତୀକୁ ଭାରତୀୟ ସମୁଦ୍ର ବନ୍ଦର ଏବଂ ବିମାନବନ୍ଦର ମାଧ୍ୟମରେ ଅନ୍ୟ ଦେଶକୁ ଏହାର ଉତ୍ପାଦ ରପ୍ତାନି କରିବାକୁ ଅନୁମତି ଦେଇଥିଲା।
