ଝାରସୁଗୁଡାରେ ବଲିଉଡ ଷ୍ଟାରଙ୍କ ପ୍ରଚାର

ଦ୍ୱିତୀୟ ପର୍ଯ୍ୟାୟ ନିର୍ବାଚନ ପାଇଁ ସବୁ ରାଜନୈତିକ ଦଳ ମଧ୍ୟରେ ଚାଲିଛି ଜୋରଦାର ପ୍ରଚାର । କିଏ କେନ୍ଦ୍ରୀୟ ନେତା କିଏ ପ୍ରଧାନମନ୍ତ୍ରୀ ତ ଆଉ କିଏ ଅଭିନେତା, ଅଭିନେତ୍ରୀଙ୍କ ଦ୍ୱାରା ଭୋଟରଙ୍କୁ କରୁଛନ୍ତି ଆକର୍ଷିତ । ବିଶେଷ କରି ତିନି ପ୍ରମୁଖ ଦଳର ଫୋକସରେ ରହିଛି ପଶ୍ଚିମ ଓଡିଶା । ପ୍ରଥମ ପର୍ଯ୍ୟାୟ ନିର୍ବାଚନ ସରିଥିବାବେଳେ ଏବେ ଫୋକସରେ ଦ୍ୱିତୀୟ ପର୍ଯ୍ୟାୟ ଭୋଟ । ଗତ ପଞ୍ଚାୟତ ନିର୍ବାଚନରେ ପଶ୍ଚିମଓଡିଶାରେ ବିଜେପିର ଭୋଟ ହାର ବୃଦ୍ଧି ପାଇଥିବାରୁ ବିଜେଡି ଓ କଂଗ୍ରେସ ଛାତିରେ ଛନକା ପସିଛି । ତେଣୁ ଏହି ଆସନରେ ବିଜେଡି ପୁନଃ ବିଜୟ ପାଇଁ ଟାଣୁଆ ନେତା ତଥା ଝାରସୁଗୁଡା ବିଧାନସଭା ପ୍ରାର୍ଥୀ ନବ ଦାସଙ୍କ ଦ୍ୱାରା ପ୍ରଚାର କରାଯାଇଛି । ତେବେ ବିଜେଡି ପ୍ରଚାରରେ ଝାରସୁଗୁଡାରେ ଦେଖିବାକୁ ମିଳିଥିଲା ବଲିଉଡ ଷ୍ଟାରଙ୍କ ଛୁଙ୍କ । ଝାରସୁଗୁଡା ନିର୍ବାଚନମଣ୍ଡଳୀ ଅନ୍ତର୍ଗତ ବିଭିନ୍ନ ଜାଗା ବୁଲି ବଲିଉଡ ଅଭିନେତା ସୁନିଲ ସେଠୀ ଓ ମହିମା ଚୌଧୁରୀ ନିର୍ବାଚନୀ ସଭାରେ ଯୋଗଦେଇ ନବ ଦାସ ଓ ବରଗଡ ସାଂସଦ ପ୍ରାର୍ଥୀ ପ୍ରସନ୍ନ ଆଚାର୍ଯ୍ୟଙ୍କ ପାଇଁ ଭୋଟ ନିବେଦନ କରିଥିଲେ । ନିର୍ବାଚନୀ ସଭା ସହ ଝାରସୁଗୁଡାରେ ରୋଡ ସୋ କରିଥିଲେ ଏହି ବଲିଉଡ ସେଲିବ୍ରିଟି ।