ମାହାଙ୍ଗା ନାବାଳିକା ମୃତ୍ୟୁ ମାମଲାରେ ନିଲମ୍ବିତ ବିଜେଡି ନେତା ଶରତ ନାୟକଙ୍କୁ ଗିରଫ କରିଛି ପୋଲିସ । ଶରତଙ୍କ ସହ ଜଗତସିଂହପୁର ଜିଲ୍ଲା ଗୋକନ ହାଇସ୍କୁଲର ଖେଳ ଶିକ୍ଷକ ଅନୁପମ ରାୟଙ୍କୁ ମଧ୍ୟ ଗିରଫ କରିଛି ପୋଲିସ । ମୃତ ନାବାଳିକାଙ୍କ ସହ ଖେଳ ଶିକ୍ଷକଙ୍କର ପ୍ରେମ ସଂପର୍କ ରହିଥିବା କୁହାଯାଉଛି । ତେବେ ଦୁଇମାସ ତଳେ ଆତ୍ମହତ୍ୟା କରିଥିବା ନାବାଳିକା ଦଶମ ଶ୍ରେଣୀରେ ପଢୁଥିଲେ । ନିକଟରେ ବିଜେଡି ନେତା ଶରତ ନାୟକ ଖେଳ ଶିକ୍ଷକ ଅନୁପମ ରାୟଙ୍କ ମାଆଙ୍କ ସଙ୍ଗେ ଫୋନରେ କରିଥିବା ବାର୍ତ୍ତାଳାପର ଅଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଯେଉଁଥିରେ ଶରତ ମାମଲା ରଫାଦଫା କରିବା ପାଇଁ ଅୁପମଙ୍କ ମାଆଙ୍କ ଠାରୁ 70 ହଜାର ଟଙ୍କା ମାଗିଥିଲେ । ସେ କିପରି ନାବାଳିକାଙ୍କ ଆତ୍ମହତ୍ୟା ପରେ ପ୍ରମାଣ ନଷ୍ଟ ପାଇଁ ପଦକ୍ଷେପ ନେଇଥିଲେ, ତାହା ଅଡିଓରେ ରହିଥିଲା । ଟେଲିଫୋନ ବାର୍ତାଳାପ ଅଡିଓ ଭାଇରାଲ ହେବା ପରେ ବିଜେଡି ନେତା ଶରତ ନାୟକ ଦଳର ପ୍ରଭାବଶାଳୀ ନେତାଙ୍କ ପାଖଲୋକ ବୋଲି ଚର୍ଚ୍ଚା ହେଉଥିଲା । ଏହି ଘଟଣା ପରେ ଦଳରୁ ଶରତଙ୍କୁ ନିଲମ୍ବିତ କରିଥିଲା ବିଜେଡି । ବିଜେଡିରୁ ନିଲମ୍ବିତ ହେବା ପରେ ପୋଲିସ ତନାଘନା ଜୋରଦାର୍ ହୋିଥିଲା । ଶରତ ନାୟକ, ଖେଳ ଶିକ୍ଷକ ଅନୁପମ ଓ ନାବାଳିକାଙ୍କ ମାଆଙ୍କୁ ପୋଲିସ ପଚରାଉଚରା କରିବା ପରେ ଆଜି ନିଲମ୍ବିତ ବିଜେଡି ନେତା ଶରତ ଓ ଖେଳ ଶିକ୍ଷକ ଅନୁପମଙ୍କୁ ପୋଲିସ ଗିରଫ କରିଛି । କଟକ ଗ୍ରାମାଞ୍ଚଳ ଏଶପି ଦେଇଥିବା ସୂଚନା ଅନୁଯାୟୀ, ନାବାଳିକାଙ୍କୁ ଆତ୍ମହତ୍ୟା କରିବା ପାଇଁ ପରିସ୍ଥିତି ସୃଷ୍ଟି କରିବା ଅଭିଯୋଗରେ ଅନୁପମଙ୍କୁ ଗିରଫ କରାଯାଇଥିବା ବେଳେ ପ୍ରମାଣ ନଷ୍ଟ କରିଥିବା ଅଭିଯୋଗରେ ଶରତଙ୍କୁ ଗିରଫ କରିଛି ।
