ଓଡ଼ିଶାର ସମସ୍ତ ଆଦର୍ଶ ବିଦ୍ୟାଳୟରେ ମୋଟ ୧୮୨୯ ଶିକ୍ଷକ ପଦବୀ ଖାଲି ପଡ଼ିଛି। ଏନେଇ ବିଧାନସଭାରେ ସୂଚନା ଦେଇଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । ସିମୁଳିଆ ବିଧାୟକ ପଦ୍ମଲୋଚନ ପଣ୍ଡାଙ୍କ ଏକ ପ୍ରଶ୍ନର ଲିଖିତ ଉତ୍ତରରେ ମନ୍ତ୍ରୀ କହିଛନ୍ତି ଯେ,” ନିଯୁକ୍ତି ପ୍ରକ୍ରିୟା ବର୍ତ୍ତମାନ ଚାଲିଛି। ଏହି ସମୟରେ, ଛାତ୍ରଛାତ୍ରୀଙ୍କ ଶିକ୍ଷାଦାନ ବାଧାପ୍ରାପ୍ତ ନହେବା ପାଇଁ, ସମସ୍ତ ବିଦ୍ୟାଳୟରେ ୧୧୭୦ ଜଣ ଅତିଥି ଶିକ୍ଷକଙ୍କୁ ନିଯୁକ୍ତି ଦିଆଯାଇଛି ।” ଓଡ଼ିଶା ଆଦର୍ଶ ବିଦ୍ୟାଳୟ ଛାତ୍ରଛାତ୍ରୀଙ୍କ ସଫଳତାକୁ ନେଇ ମନ୍ତ୍ରୀ କହିଛନ୍ତି ଯେ, ଗତ ତିନି ବର୍ଷ ମଧ୍ୟରେ, ଦ୍ୱାଦଶ ଶ୍ରେଣୀ ପାସ୍ କରିଥିବା ୬୨ ଜଣ ଛାତ୍ରଛାତ୍ରୀଙ୍କୁ ସେହି ବର୍ଷ ଉଚ୍ଚଶିକ୍ଷା ପାଇଁ ଯୋଗ୍ୟ ବିବେଚିତ କରାଯାଇଛି, ଯେଉଁଥିରେ ପାଞ୍ଚ ଜଣ IIT ପାଇଁ ଓ ୩୧ ଜଣ NIT ପାଇଁ ଯୋଗ୍ୟତା ହାସଲ କରିଛନ୍ତି ।ବାଲେଶ୍ୱର ଜିଲ୍ଲା ଉପରେ ଧ୍ୟାନ ଦେଇ ମନ୍ତ୍ରୀ ଉଲ୍ଲେଖ କରିଥିଲେ ଯେ ଜିଲ୍ଲାରେ ୧୨ଟି ବ୍ଲକ ଅଛି, ପ୍ରତ୍ୟେକ ବ୍ଲକରେ ଗୋଟିଏ ଆଦର୍ଶ ବିଦ୍ୟାଳୟ ଅଛି। ରେମୁଣା ବ୍ଲକରେ ଷଷ୍ଠ ଏବଂ ସପ୍ତମ ଶ୍ରେଣୀ ପାଇଁ ପ୍ରଥମ ପ୍ରବେଶ ୨୦୧୮-୧୯ ଶିକ୍ଷାବର୍ଷରେ ହୋଇଥିଲା। ରେମୁଣାର ଦ୍ୱାଦଶ ଶ୍ରେଣୀର ପ୍ରଥମ ବ୍ୟାଚ୍ ୨୦୨୪-୨୫ ମସିହାରେ ପରୀକ୍ଷା ଦେଇଥିଲେ। ସେହି ବର୍ଷ, ଜଣେ ଛାତ୍ର NIT ରାଉରକେଲାରେ ଇଞ୍ଜିନିୟରିଂ ପାଇଁ ପ୍ରବେଶ ପାଇଥିଲେ ଓ ଅନ୍ୟ ଜଣେ ବ୍ରହ୍ମପୁରର MKCGରେ ଡାକ୍ତରୀ ପାଠପଢ଼ା ପାଇଁ ଯୋଗ୍ୟତା ଅର୍ଜନ କରିଥିଲେ।ବର୍ତ୍ତମାନ, ଜିଲ୍ଲାର ସମସ୍ତ ସ୍କୁଲରେ ନବମ ଶ୍ରେଣୀ ପର୍ଯ୍ୟନ୍ତ ପାଠପଢ଼ା ଚାଲିଛି।
