ଓଡିଶା ଲଳିତ କଳା ଏକାଡେମୀର ନୂଆ ସଭାପତି ହେଲେ ସୁଦର୍ଶନ

ଅାନ୍ତର୍ଜାତୀୟ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକଙ୍କୁ ମିଳିଛି ନୂଆ ନିଯୁକ୍ତି । ଓଡିଶା ଲଳିତ କଳା ଏକାଡେମୀର ସଭାପତି ଭାବରେ ନିଯୁକ୍ତ ହୋଇଛନ୍ତି ସୁଦର୍ଶନ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ଏହି ନୂଆ ଦାୟିତ୍ୱ ପ୍ରଦାନ କରିଛନ୍ତି । ପୂର୍ବରୁ ଏହି ପଦରେ ନବ ନିଯୁକ୍ତ ସାଂସଦ ରଘୁନାଥ ମହାପାତ୍ର ଥିଲେ ।
ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ଆନ୍ତର୍ଜାତୀୟ ସ୍ତରରେ ୫୦ଟି ବାଲୁକା ଶିଳ୍ପ ଚାମ୍ପିୟନସିପରେ ଭାରତରୁ ପ୍ରତିନିଧିତ୍ୱ କରିବା ସହ ୨୦୧୭-୧୮ରେ ସେ ୨୭ଟି ଚାମ୍ପିଅନସିପ ପ୍ରାଇଜ ହାସଲ କରି ଦେଶକୁ ଗୌରବ ଆଣିଛନ୍ତି । ବାଲୁକା ଶିଳ୍ପରେ ଓଡିଶାକୁ ବିଶ୍ୱସ୍ତରରେ ଏକ ଭିନ୍ନ ପରିଚୟ ସୃଷ୍ଟି କରାଇବାରେ ସେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ।