ଭୁବନେଶ୍ବର : ଆମ ବ୍ୟବସ୍ଥାରୁ ମାଓବାଦୀମାନେ ଜନ୍ମ ହୁଅନ୍ତି । ବ୍ୟବସ୍ଥା ବଦଳିଲେ ଆଉ ମାଓବାଦୀ ସମସ୍ୟା ହୋଇ ରହିବନି । ବରିଷ୍ଠ ସାମ୍ବାଦିକ ଅପୂର୍ବ କୁମାର ମହାନ୍ତିଙ୍କ ଲିଖିତ ‘ମୁଁ ବି ମାଓବାଦୀ’ ପୁସ୍ତକ ଉନ୍ମୋଚନ ଅବସରରେ ଏହା କହିଛନ୍ତି ପୂର୍ବତନ ସାଂସଦ ଓ ବିଧାୟକ ତଥା ଇଷ୍ଟର୍ଣ୍ଣ ମିଡିଆ ଅଧ୍ୟକ୍ଷ ଶ୍ରୀ ସୌମ୍ୟ ରଂଜନ ପଟ୍ଟନାୟକ । ଗୀତଗୋବିନ୍ଦ ଭବନରେ ତକ୍ଷକ ମିଡିଆ ଆୟୋଜିତ ପୁସ୍ତକ ଉନ୍ମୋଚନ ଉତ୍ସବରେ ଯୋଗଦେଇ ଶ୍ରୀ ପଟ୍ଟନାୟକ କହିଥିଲେ, ଏବେ ମାଓବାଦୀ ହେବାର ଆଉ ଆବଶ୍ୟକ ନାହିଁ । ଲୋକମାନେ ସେମାନଙ୍କ ଅଧିକାର ସଂପର୍କରେ ସଚେତନ ହେଲେ ମାଓବାଦୀ ସମସ୍ୟା ଦୂର ହୋଇଯିବ ।
ବରିଷ୍ଠ ସାମ୍ବାଦିକ ସମ୍ପଦ ମହାପାତ୍ରଙ୍କ ଅଧ୍ୟକ୍ଷତାରେ ଆୟୋଜିତ ପୁସ୍ତକ ଉନ୍ମୋଚନ ଉତ୍ସବରେ ମୁଖ୍ୟ ଅତିଥି ଭାବେ ଶ୍ରୀ ସୌମ୍ୟରଂଜନ ପଟ୍ଟନାୟକ, ସମ୍ମାନିତ ଅତିଥି ଭାବେ ସିପିଆଇଏମ ବରିଷ୍ଠ ନେତା ଶ୍ରୀ ସନ୍ତୋଷ ଦାସ ଏବଂ ଅଧ୍ୟାପକ ବିଶ୍ବରଂଜନ ଯୋଗଦେଇ ଅପୂର୍ବ କୁମାର ମହାନ୍ତିଙ୍କ ‘ମୁଁ ବି ମାଓବାଦୀ’ ଏବଂ ସୁଜାତା ମହାନ୍ତିଙ୍କ ଭକ୍ତି ନୈବେଦ୍ୟ ପୁସ୍ତକ ‘ଚୁନା ଚୁନା ଫୁଲ’ କୁ ଉନ୍ମୋଚନ କରିଥିଲେ । ଅଧ୍ୟାପିକା ମମତା ଦାସ ଚୁନା ଚୁନା ଫୁଲ ପୁସ୍ତକ ସଂପର୍କରେ ଆଲୋଚନା କରିଥିଲେ । କମ୍ୟୁନିଷ୍ଟ ନେତା ସନ୍ତୋଷ ଦାସ ମାଓବାଦୀଙ୍କ ଉତ୍ପତ୍ତି ଏବଂ ଓଡିଶାରେ ସେମାନଙ୍କ ପ୍ରଭାବ ସଂପର୍କରେ ଆଲୋଚନା କରିଥିଲେ । ସେହିପରି ଅଧ୍ୟାପକ ବିଶ୍ବରଂଜନ ‘ମୁଁ ବି ମାଓବାଦୀ’ ପୁସ୍ତକ ସଂପର୍କରେ ଆଲୋଚନା କରି କହିଥିଲେ, ବିଭିନ୍ନ ଘଟଣାକ୍ରମରେ ମାଓବାଦୀଙ୍କ ସଂପର୍କରେ ରିପୋର୍ଟିଂ ଘଟଣାକୁ ପୁସ୍ତକରେ ଅତି ସୁନ୍ଦର ଭାବେ ବର୍ଣ୍ଣନା କରାଯାଇଛି । ମୁଖ୍ୟ ଅତିଥି ଶ୍ରୀ ପଟ୍ଟନାୟକ ସାମ୍ବାଦିକମାନେ ନିର୍ଭୀକ ହେବା ଉଚିତ ଏବଂ ଅପୂର୍ବ ମହାନ୍ତିଙ୍କ ଲିଖିତ ପୁସ୍ତକରେ ଜଣେ ସାମ୍ବାଦିକର ଦୁଃସାହସିକ ରିପୋର୍ଟିଂ ସଂପର୍କରେ ଉଲ୍ଲେଖ ଥିବାରୁ ଏହାକୁ ସାମ୍ବାଦିକତା ବୃତ୍ତିଧାରୀ ମାନେ ପଢିବା ଉଚିତ ବୋଲି କହିଥିଲେ ।
ପୁସ୍ତକ ଉନ୍ମୋଚନ ଉତ୍ସବରେ ସୁଜାତା ମହାନ୍ତି ଲେଖକୀୟ ଅଭିବ୍ୟକ୍ତି ପ୍ରଦାନ କରିଥିଲେ । କାର୍ଯ୍ୟକ୍ରମ ସଞ୍ଚାଳନ କରିଥିଲେ ସୌମ୍ୟାଲଗ୍ନା ।
