ପଦ୍ମ ଧରିଲେ ପଦ୍ମଲୋଚନ

୨୦୧୯ ନିର୍ବାଚନ ଯେତେ ପାଖେଇ ଆସୁଛି, ରାଜ୍ୟ ରାଜନୀତିର ଉଷ୍ମତା ସେତିକି ବଢିବାରେ ଲାଗିଛି । ବାଲେଶ୍ୱରର ଟାଣୁଆ ନେତା ତଥା ପୂର୍ବତନ ମନ୍ତ୍ରୀ ପଦ୍ମଲୋଚନ ପଣ୍ଡା ବିଜେପିରେ ମିଶିଛନ୍ତି । କିଛି ଦିନ ତଳେ କଂଗ୍ରେସ ଛାଡିଥିଲେ ପଦ୍ମଲୋଚନ । ଆଜି ବିଧିବଦ୍ଧ ଭାବେ ଭାରତୀୟ ଜନତା ପାର୍ଟିରେ ଯୋଗ ଦେଇଛନ୍ତି । ଖଇରା ବ୍ଲକ ପାତ୍ରପୁର ମେଲଣ ପଡ଼ିଆରେ
ଅନୁଷ୍ଠିତ ବିଜେପିର ମିଶ୍ରଣ ପର୍ବରେ ପଦ୍ମଲୋଚନ ପଣ୍ଡା ଓ ଶୁଭଙ୍କର ମହାପାତ୍ର ଯୋଗ ଦେଇଛନ୍ତି । ଏହି ମିଶ୍ରଣ ପର୍ବରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାଜ୍ୟ ସଭାପତି ବସନ୍ତ ପଣ୍ଡା, ସମୀର ମହାନ୍ତି, ପ୍ରତାପ ଷଡଙ୍ଗୀ ପ୍ରମୁଖ ଉପସ୍ଥିତ ରହିଥିଲେ । ଶ୍ରୀ ପଣ୍ଡା ଏକ ବିରାଟ ପଟୁଆରରେ ଆସି ନିଜର ଶହଶହ ସମର୍ଥକଙ୍କ ସହ ବିଜେପିରେ ସାମିଲ ହୋଇଛନ୍ତି । ସୁଚନା ଅନୁସାରେ ଗତ ୭ ତାରିଖରେ ଗୋଷ୍ଠୀକନ୍ଦଳର କାରଣ ଦର୍ଶାଇ ସେ କଂଗ୍ରେସରୁ ଇସ୍ତଫା ଦେଇଥିଲେ । ପଦ୍ମଲୋଚନ ଗିରିଧାରୀ ଗମାଙ୍ଗଙ୍କ କ୍ୟାବିନେଟରେ ମତ୍ସ୍ୟ ଏବଂ ପଶୁସମ୍ପଦ ବିଭାଗର ମନ୍ତ୍ରୀ ରହିଥିଲେ ।