କମେଡିଆନ ଭେନୁ ମାଧବଙ୍କ ନିଧନ

ଆରପାରିରେ ସାଉଥ୍‌ ଫିଲ୍ମ ଇଣ୍ଡଷ୍ଟ୍ରିର ଆଗଧାଡ଼ିର କମେଡିଆନ ଭେନୁ ମାଧବ | ପରଦା ଉପରେ ଦର୍ଶକଙ୍କୁ ହସେଇ ହସେଇ ବେଦମ କରୁଥିବା ଭେନୁ ଆଉ ନାହାନ୍ତି | ଚିକିତ୍ସାଧୀନ ଅବସ୍ଥାରେ ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି | ମଙ୍ଗଳବାର ମଧ୍ୟାହ୍ନ ୧୨ଟା ୨୧ ମିନିଟ୍‌ରେ ସିକନ୍ଦରାବାଦର ଏକ ଘରୋଇ ହସ୍ପିଟାଲରେ ସେ ଆଖି ବୁଜିଛନ୍ତି | ଦୀର୍ଘ ଦିନ ହେବ ସେ ଲିଭର୍‌ ଓ କିଡ୍‌ନୀ ସଂକ୍ରାନ୍ତୀୟ ରୋଗରେ ପୀଡ଼ିତ ଥିବା ବେଳେ ଅଧିକ ଗୁରୁତର ହେବାରୁ ତାଙ୍କୁ ଲାଇଭ୍‌ ସପୋର୍ଟ ସିଷ୍ଟମ୍‌ରେ ରଖାଯାଇ ଚିକିତ୍ସା କରାଯାଉଥିଲା | ମାତ୍ର ଡାକ୍ତରଙ୍କ ସମସ୍ତ ପ୍ରଚେଷ୍ଟା ବିଫଳ ହୋଇଛି | ତାଙ୍କର ଦୁଇ ପୁତ୍ରସନ୍ତାନ ଅଛନ୍ତି | ୧୯୭୯ ମସିହାରେ ତେଲେଙ୍ଗାନା ରାଜ୍ୟର କୋଡ଼ାଡ଼ରେ ଜନ୍ମ ଗ୍ରହଣ କରିଥିଲେ ଭେନୁ ମାଧବ | ୧୯୯୬ ମସିହାରେ ‘ସମ୍ପ୍ରଦାୟମ୍‌’ ଫିଲ୍ମ ଜରିଆରେ ସେ ଟଲିଉଡ୍‌ ଇଣ୍ଡଷ୍ଟ୍ରିରେ ପାଦ ଥାପିଥିଲେ | ଏହା ପର ବର୍ଷ ତାଙ୍କୁ ‘ମାଷ୍ଟର୍‌’ ଫିଲ୍ମରେ ଦେଖିବାକୁ ମିଳିଥିଲା | ହାସ୍ୟ ଅଭିନେତା ଭାବେ ଖ୍ୟାତି ଅର୍ଜନ କରିଥିବା ଏହି ଅଭିନେତା ବହୁ ସୁପରହିଟ୍‌ ଫିଲ୍ମରେ କାମ କରିଛନ୍ତି | ଏହା ବ୍ୟତୀତ ବହୁ ଟେଲିଭିଜନ୍ ପ୍ରୋଗ୍ରାମରେ ସେ ହୋଷ୍ଟ ଭାବେ ଦର୍ଶକଙ୍କ ତାଳି ସାଉଣ୍ଟିଛନ୍ତି | ଖୁବ୍‌ କମ୍‌ ବୟସରୁ ସଫଳତାର ସ୍ୱାଦ ଚାଖିଥିବା ଏହି ହାସ୍ୟ ଅଭିନେତା ଅସୁସ୍ଥତା ହେତୁ ଦୀର୍ଘ ଦିନ ହେଲା ରୁପେଲି ପରଦାରୁ ଦୂରେଇ ଯାଇଥିଲେ | ସେ ପ୍ରାୟ ୫୦୦ ଫିଲ୍ମରେ ହାସ୍ୟ ଅଭିନେତା ଭାବେ କାମ କରିଛନ୍ତି | ତାଙ୍କ ଦେହାନ୍ତ ଖବର ପ୍ରଚାର ହେବ ପରେ ସମଗ୍ର ଟଲିଉଡ୍‌ ଇଣ୍ଡଷ୍ଟ୍ରିରେ ଶୋକର ଛାୟା ଖେଳି ଯାଇଛି |