କାଠ ଫାଳିଆରେ ପିଟି ହତ୍ୟା, ଭାଇ ଭାଉଜ ଅଟକ

ଢେଙ୍କାନାଳ ସଦର ଥାନା ଅନ୍ତର୍ଗତ ଗୋବିନ୍ଦପୁର ଫାଣ୍ଡି ଅଞ୍ଚଳରେ ଘଟିଛି ହତ୍ୟାକାଣ୍ଡ । ଏହି ଗାଁର ପ୍ରଦିପ ମଲ୍ଲୀକ(୪୦) ନାମକ ଜଣେ ଯୁବକଙ୍କୁ କାଠ ଫାଳିଆରେ ପିଟି ପିଟି ହତ୍ୟା କରାଯାଇଛି । ତାଙ୍କ ଶୋଇବା ଘରୁ ରକ୍ତ ଜୁଡୁ ବୁଡୁ ଅବସ୍ଥାରେ ପ୍ରଦୀପଙ୍କ ମୃତ ଦେହକୁ ପୁଲିସ ଜବତ କରିଛି । ତାଙ୍କ ଘର ପରିସରରୁ ଏକ ରକ୍ତଲଗା କାଠ ଫାଳିଆକୁ ପୁଲିସ ଜବତ କରିଛି । ସନ୍ଦେହରେ ମୃତ ପ୍ରଦିପଙ୍କ ବଡ ଭାଇ ଓ ଭାଉଜଙ୍କୁ ପୁଲିସ ଅଟକ ରଖିଛି । ପୁଲିସ ଫରେନସିକ ଟିମ୍ ମାଧ୍ୟମରେ ତଦନ୍ତ ଚଳାଇଛି ।
ସୂଚନାଯୋଗ୍ୟ, ଢେଙ୍କାନାଳ ସଦର ଥାନା ଅନ୍ତର୍ଗତ ଗୋବିନ୍ଦପୁର ଫାଣ୍ଡି ଅଞ୍ଚଳରେ ଏହି ହତ୍ୟାକାଣ୍ଡ ଘଟିଛି । ଗୋବିନ୍ଦପୁର ଛକରେ ମୃତ ପ୍ରଦୀପ ମଲ୍ଲୀକ ଘର । ସେ ଗୋବିନ୍ଦପୁର ଛକରେ ଏକ ଚା ଦୋକାନ କରି ଗୁଜୁରାଣ ମେଣ୍ଟାଉଥିଲେ । ମୃତ ପ୍ରଦିପଙ୍କ ପତ୍ନୀ ତାଙ୍କ ଝିଅକୁ ନେଇ ତାଙ୍କ ବାପ ଘରକୁ ଯାଇଥିବା ବେଳେ ପ୍ରଦିପ ତାଙ୍କ ଘରେ ଏକୁଟିଆ ଥିଲେ । ଗତ ରାତିରେ କେହି ତାଙ୍କୁ ପିଟି ହତ୍ୟା କରିଥିବା ବେଳେ ତାଙ୍କ ଘରେ ରକ୍ତ ଜୁଡୁ ବୁଡୁ ଅବସ୍ଥାରେ ମୃତ ଦେହ ପଡିଥିବା ଦେଖାଯାଇଛି । ଖବର ପାଇ ଘଟଣାସ୍ଥଳରେ ସଦର ଥାନା ଅଧିକାରୀ ଓ ଗୋବିନ୍ଦପୁର ପୁଲିସ ପହଁଞ୍ଚି ମୃତ ଦେହ ଜବତ କରିଛି । ଘରୁ ଏକ ରକ୍ତଲଗା କାଠ ଫାଳିଆକୁ ପୁଲିସ ଜବତ କରିଛି । ହତ୍ୟାକାଣ୍ଡର ସଠିକ କାରଣ ଜଣା ନ ପଡିଥିଲେ ମଧ୍ୟ ମଦ୍ୟପାନକୁ ନେଇ ପାଟି ତୁଣ୍ଡରୁ ଏହି ହତ୍ୟାକାଣ୍ଡ ଘଟିଥିବା ସନ୍ଦେହ ଘେରକୁ ଆସିଛି । ମୃତକ ପ୍ରଦୀପଙ୍କ ବଡ ଭାଇ ଦିପକ ମଲ୍ଲୀକ(୪୭)ଓ ଭାଉଜ ଲକ୍ଷ୍ମୀ ମଲ୍ଲିକ(୩୭)ଙ୍କୁ ପୁଲିସ ଅଟକ ରଖିଛି । ପୁଲିସ ଫରେନସିକ ଟିମ ଓ ଅନୁସଂନ୍ଧାନୀ କୁକୁର ମାଧ୍ୟରେ ହତ୍ୟାକାଣ୍ଡର ତଦନ୍ତ କରୁଛି ପୁଲିସ । ତେବେ ଗତ କାଲି ରାତିରେ ପ୍ରଦୀପ ମଦ୍ୟପାନ କରି ଘରକୁ ଆସି ପାଟି କରୁଥିଲେ ବୋଲି ତାଙ୍କ ବଡ ଭାଇ ଦୀପକ ସ୍ୱିକାର କରିଛନ୍ତି । ମାତ୍ର ଭୋର ସମୟରେ ୩ଜଣ ମୁଖା ପିନ୍ଧା ଯୁବକ ତାଙ୍କ ଘରେ ପଶି ତାଙ୍କୁ ପିଟି ପିଟି ହତ୍ୟା କରିଥିବା ମୃତ ପ୍ରଦିପର ଭାଇ ଦୀପକ ସଫେଇ ଦେଉଛନ୍ତି । ତଦନ୍ତ ପରେ ସଠିକ ରହସ୍ୟ ଜଣାପଡିବ ବୋଲି ସଦର ଥାନା ଅଧିକାରୀ ମଳୟ ନାୟକ ପ୍ରକାଶ କରିଛନ୍ତି ।