ଲକ୍ଷ୍ନୌ : ରାସ୍ତା ମଝିରେ ଅଟୋ ଚାଳକଙ୍କ ପ୍ରତି ଦୁର୍ବ୍ୟବହାର ପ୍ରଦର୍ଶନ କରୁଥିଲେ ଜଣେ ଯୁବତୀ । ଆଉ ଜଣେ ଯୁବତୀ ମୋବାଇଲରେ ଭିଡିଓ ସୁଟ୍ କରୁଥିଲେ । ଯୁବତୀ ଜଣକ ଅଟୋ ଡ୍ରାଇଭରଙ୍କ ବେକରେ ଏକ କପଡା ଗୁଡାଇ ଝିଙ୍କୁଥିଲେ । ଅଟୋ ଚାଳକ କେବଳ ଆତ୍ମରକ୍ଷା କରିବାକୁ ଚେଷ୍ଟା କରୁଥିଲେ । ରାସ୍ତା ମଝିରେ କିଛି ସମୟ ପାଇଁ ଏମିତି ଦୃଶ୍ୟକୁ ସମସ୍ତେ ଦେଖୁଥିଲେ । ମନେ ହେଉଥିଲା ଅଟୋ ଚାଳକ ଯୁବତୀଙ୍କ ପ୍ରତି କିଛି ଅଶାଳୀନ ଆଚରଣ କରିଥିବାରୁ ସେ ଏଭଳି ଆକ୍ରମଣ କରୁଛନ୍ତି । ମାତ୍ର ଅଟୋ ଚାଳକ କହିବା କଥା, ସେ ଭଡା ମାଗିବାରୁ ଯୁବତୀ ଜଣକ ସେ ଜଣେ କଲେଜ ଛାତ୍ରୀ ଏବଂ ଭଡା ଦେବେ ନାହିଁ ବୋଲି କହିଥିଲେ । ଅଟୋ ଚାଳକ ଭଡା ପାଇଁ ଜିଦ୍ କରିବାରୁ ଯୁବତୀ ଜଣକ ତାଙ୍କ ଉପରେ ଆକ୍ରମଣ ଆରମ୍ଭ କରିଦେଇଥିଲେ । ପରେ ତାଙ୍କ ସାଙ୍ଗ ଦ୍ବାରା ରେକର୍ଡ କରାଯାଇଥିବା ମୋବାଇଲ ଭିଡିଓକୁ ନିଜ ଇନଷ୍ଟାଗ୍ରାମରେ ପୋଷ୍ଟ କରିଦେଇଥିଲେ । ଭିଡିଓ ଭାଇରାଲ ହେବା ଜାଣିବା ପରେ ଅଟୋ ଚାଳକ ଜଣକ ନିଜ ସମ୍ମାନ ବଞ୍ଚେଇବାକୁ ପୋଲିସର ଦ୍ବାରସ୍ଥ ହୋଇଛନ୍ତି । ଉତ୍ତରପ୍ରଦେଶ ମିର୍ଜାପୁରରେ ଏହି ଘଟଣା ଘଟିଛି । ଯୁବତୀ ପ୍ରୀୟାଂଶୀ ପାଣ୍ଡେଙ୍କ ବିରୋଧରେ ଅଟୋ ଚାଳକ ବିଳେଶ ଶୁକ୍ଳା ଥାନାରେ ଏତଲା ରୁଜୁ କରି ନ୍ୟାୟ ଦାବି କରିଛନ୍ତି ।
