ଆଗୁଆ ଚାକିରୀରୁ ଅବସର ନେଲେ ବରିଷ୍ଠ ଆଇଏଏଏସ ଅଧିକାରୀ ସୁଜାତା ଆର୍ କାର୍ତ୍ତିକେୟନ । ଆଇଏଏସ ସୁଜାତା କାର୍ତ୍ତିକେୟନ ଗତ 13 ତାରିଖରେ ଭିଆରଏସ ପାଇଁ ଆବେଦନ କରିଥିଲେ । ମାତ୍ର ରାଜ୍ୟ ସରକାର ତାଙ୍କ ଆବେଦନକୁ 14 ଦିନ ପକାଇ ରଖିବା ପରେ ଗତ 27 ତାରିଖରେ କେନ୍ଦ୍ର ସରକାରଙ୍କ କାର୍ମିକ ମନ୍ତ୍ରାଳୟକୁ ପଠାଇଥିଲେ । ସୁଜାତାଙ୍କ ଆବେଦନକୁ କେନ୍ଦ୍ର ସରକାର ମଞ୍ଜୁରୀ ଦେବା ସହ ତାଙ୍କୁ ସ୍ବେଚ୍ଛାକୃତ ଅବସର ଦେବା ପାଇଁ ମୁଖ୍ୟ ଶାସନସଚିବଙ୍କ ନିକଟକୁ ଚିଠି ଲେଖିଛନ୍ତି । ନିୟମ ମୁତାବକ ତିନିମାସର ନୋଟିସ ପିରିଅଡକୁ ସୁଜାତାଙ୍କ କ୍ଷେତ୍ରରେ କୋହଳ କରିବାକୁ ନିର୍ଦ୍ଦେଶ ଦିଆଯାଇଛି । 29 ତାରିଖରେ ରାଜ୍ୟ ସରକାରଙ୍କ ପକ୍ଷରୁ ଏ ନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି । 2000 ବ୍ୟାଚର ଆଇଏସ ଅଫିସର ହେଉଛନ୍ତି ସୁଜାତା । 2024 ନିର୍ବାଚନ ପୂର୍ବରୁ ସୁଜାତା କାର୍ତ୍ତିକେୟନଙ୍କ ସ୍ବାମୀ ଆଇଏଏସ ଭି.କେ. ପାଣ୍ଡିୟାନ ଚାକିରୀରୁ ଭିଆରଏସ ନେଇ ବିଜେଡିରେ ଯୋଗ ଦେଇଥିଲେ । ନିର୍ବାଚନରେ ଗତ ଚବିଶବର୍ଷର ବିଜେଡି ସରକାରର ପତନ ପଛରେ ପାଣ୍ଡିୟାନଙ୍କ ଭୂମିକାକୁ ମୁଖ୍ୟ କାରଣ ବୋଲି ଦର୍ଶାଇ ବିଜେଡି ନେତାମାନେ ତାଙ୍କୁ ସମାଲୋଚନା କରି ଆସୁଛନ୍ତି । ନିର୍ବାଚନ ହାରିବା ପରେ ପାଣ୍ଡିୟାନଙ୍କ ଗୋଟି ଚାଳନା ଆଉ ସଫଳ ହୋଇପାରୁ ନ ଥିବାରୁ ଉଭୟ ସ୍ବାମୀ ସ୍ତ୍ରୀ ଓଡିଶା ଛାଡି ଲଣ୍ଡନ ଯିବାକୁ ଯୋଜନା କରୁଛନ୍ତି ।
