ଭୁଜବଲ ନିକଟସ୍ଥ ବ୍ରିଜ ଉପରେ ଅଭାବନୀୟ ଘଟଣା ଦେଖିବାକୁ ମିଳିଛି । ଏକ ୪୦୭ ଗାଡି ଧକ୍କାରେ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ସୂଚନା ଯେ,ଭୁଜବଲ ଅଞ୍ଚଳର ଚୈତନ୍ୟ ଗୁଆବଂଶ ନାମକ ଜଣେ ବ୍ୟକ୍ତି ଜେକେ କମ୍ପାନୀରେ ଲେବର କାମ କରନ୍ତି । ସେ ଆଜି ସକାଳେ ଏକ ସାଇକେଲ ଯୋଗେ କାଗଜ କଳକୁ ଯାଉଥିଲେ । ସେହି ସମୟରେ ଆମଲାଭଟ ସ୍ଥିତ ଦେଶୀ ଭାଟିରେ କାମ କରୁଥିବା ବିରସିଂହ ନାମକ ଆଉ ଜଣେ ବ୍ୟକ୍ତି ପ୍ରାପ୍ତ ଭ୍ରମଣ କରୁଥିଲେ । ସେହି ସମୟରେ ପଛପଟୁ ଏକ ୪୦୭ ଗାଡି ତାଙ୍କୁ ଧକ୍କା ଦେଇ ତାଙ୍କ ଗୋଡ ଉପରେ ଚଢିଯାଇ ଆଗରେ ଥିବା ଚୈତନ୍ୟଙ୍କୁ ମଧ୍ୟ ଧକ୍କା ଦେଇଥିଲା । ଘଟଣା ସ୍ଥଳରେ ଚୈତନ୍ୟ ଗୁଆବଂଶଙ୍କର ମୃତ୍ୟୁ ହୋଇଥିବା ବେଳେ ବିରସିଂହଙ୍କୁ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ବିରସିଂହଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ବିଶାଖାପାଟଣା ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି । ଘଟଣା ସ୍ଥଳରେ ପୋଲିସ ପହଁଞ୍ଚି ଗାଡିକୁ ଜବଦ କରିବା ସହ ଶବ ବ୍ୟବଚ୍ଛେଦ ପାଇଁ ହସ୍ପିଟାଲକୁ ପଠାଯାଇଛି ।
