କିଏ ହେବେ କଂଗ୍ରେସର ପିସିସି ସଭାପତି ? ନିରଞ୍ଜନ ଆଉ କଂଗ୍ରେସର ନେତୃତ୍ବ ନେଇ ପାରୁନାହାଁନ୍ତି । ବରଂ ନିରଞ୍ଜନଙ୍କ ନେତୃତ୍ବରେ ଦଳ ଆହୁରି ତଳକୁ ତଳକୁ ଯାଉଛି । ଏଭଳି ସ୍ଥିତିରେ ନିରଞ୍ଜନଙ୍କୁ ହଟାଇ ନୂଆ ପିସିସି ସଭାପତି ନିଯୁକ୍ତ କରିବାକୁ ଦଳ ଭିତରେ ଚାପ ବଢୁଥିବା ବେଳେ ସୁର ରାଉତରାୟଙ୍କ ମନ୍ତବ୍ୟ ଏହି ଚର୍ଚ୍ଚାକୁ ଆହୁରି ରୋଚକ କରିଛି । ସୁର କହିଛନ୍ତି, ନବୀନଙ୍କ ଇଚ୍ଛାରେ ନିଯୁକ୍ତ ହେବେ ପିସିସି ସଭାପତି । ଏପରିକି କଂଗ୍ରେସର ପ୍ରଭାରୀ ନିଯୁକ୍ତି ବି ନବୀନଙ୍କ ଇଚ୍ଛାରେ ହୁଏ ବୋଲି ସୁର କହିଛନ୍ତି । ଯାହା ହେବ, ନବୀନ କରିଦେବେ ବୋଲି ସୁର କହିଛନ୍ତି । ଅର୍ଥାତ କେବଳ ନିଜ ଦଳ ବିଜେଡି ନୁହେଁ, ବିରୋଧୀଙ୍କ ଶିବିରରେ ବି ନବୀନଙ୍କ ଦବଦବା ରହିଛି ବୋଲି ଧରିବାକୁ ହେବ । ତେବେ ସୁରଙ୍କ ଏଭଳି ମନ୍ତବ୍ୟକୁ ଖଣ୍ଡନ କରିଛନ୍ତି ବିଜେଡି ନେତା ଦେବାଶୀଷ ସାମନ୍ତରାୟ । ସେ କହିଛନ୍ତି, ନବୀନଙ୍କ ଆଗ୍ରହ କେବଳ ଓଡିଶା ଓ ବିଜେଡିରେ । ଅନ୍ୟଦଳରେ କଣ ହେବ, ସେଥିରେ ନବୀନଙ୍କ କୌଣସି ଆଗ୍ରହ ନାହିଁ ।
