ବାରବର୍ଷର ନାବାଳିକା ଦୁଷ୍କର୍ମର ଶୀକାର ହେଲା ପରେ ଉଲଗ୍ନ ଓ ରକ୍ତାକ୍ତ ଅବସ୍ଥାରେ ଲୋକଙ୍କୁ ସାହାଯ୍ୟ ପାଇଁ ହାତ ପତଉଛି । ମାତ୍ର ଲଜ୍ଜାର ବିଷୟ, ଦୁଷ୍କର୍ମ ପୀଡିତା ନାବାଳିକାକୁ କେହି ସାହାଯ୍ୟ କରୁନାହାଁନ୍ତି । ତାର ଉଲଗ୍ନ ଶରୀରକୁ ଢାଙ୍କିଦେବା ପାଇଁ କାହା ପାଖରେ କପଡା ଖଣ୍ଡେ ବି ନାହିଁ । ଘରକୁ ଘର ବୁଲି ସାହାଯ୍ୟ ମାଗୁଥିବା ନାବାଳିକାକୁ ଲୋକେ ଘଉଡାଇ ଦେଉଥିବାର ଦୃଶ୍ୟ କଏଦ ହୋଇଛି ସିସିଟିଭିରେ । ଘଟଣା ଘଟିଛି ମଧ୍ୟପ୍ରଦେଶର ଉଜ୍ଜୟିନୀରେ । ଜଣେ ନାବାଳିକା ରକ୍ତାକ୍ତ ଅବସ୍ଥାରେ ବୁଳୁଥିବାର ଭିଜୁଆଲ ସିସିଟିଭିରେ ରେକର୍ଡ ହୋଇଛି । ଗୋଟିଏ ଘରକୁ ଯାଇ ସେ ସାହାଯ୍ୟ ମାଗୁଛି, ମାତ୍ର ଘର ଆଗରେ ଛିଡା ହୋଇଥିବା ଜଣେ ମହିଳା ତାଙ୍କୁ ଫେରାଇ ଦେଉଛନ୍ତି । ତେବେ ନାବାଳିକା ଜଣକ ଏକ ଆଶ୍ରମ ନିକଟରେ ପହଞ୍ଚିବା ପରେ ଆଶ୍ରମର ଜଣେ ସନ୍ଥ ବାହାରି ଆସି ତାଙ୍କୁ ଚାଦରରେ ଘୋଡାଇ ଦେବା ସହ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରିଛନ୍ତି । ଡାକ୍ତର ସ୍ପଷ୍ଟ କରିଛନ୍ତି, ନାବାଳିକା ଜଣକ ଦୁଷ୍କର୍ମର ଶୀକାର ହୋଇଛନ୍ତି । ନାବାଳିକାଙ୍କ ଚିକିତ୍ସା ପାଇଁ ରକ୍ତ ଆବଶ୍ୟକ ଥିବାରୁ ତାଙ୍କୁ ଇନ୍ଦୋର ହସପିଟାଲକୁ ସ୍ଥାନାନ୍ତର କରାଯାଇଛି । ତେବେ ଦୁଷ୍କର୍ମ କରିଥିବା ଅଜଣା ବ୍ୟକ୍ତିଙ୍କୁ ଚିହ୍ନଟ କରି ଖୁବଶୀଘ୍ର ଧରାଯିବ ବୋଲି ପୋଲିସ କହିଛି ।
