ଭାରତର ସର୍ବବୃହତ୍ ଆଇଟି ସେବା ପ୍ରଦାନକାରୀ ଟାଟା କନସଲ୍ଟେନ୍ସି ସର୍ଭିସେସ୍ – ଟିସିଏସ 2026 ଆର୍ଥିକ ବର୍ଷରେ ନିଜ କର୍ମଚାରୀ ସଂଖ୍ୟାର 2 ପ୍ରତିଶତ କମାଇବାକୁ ନିଷ୍ପତ୍ତି ନେଇଛି । କମ୍ପାନୀ ପକ୍ଷରୁ କୁହାଯାଇଛି ଯେ, ଏହାଦ୍ବାରା କଂପାନୀର ମଧ୍ୟମ ଓ ବରିଷ୍ଠ ବର୍ଗର କର୍ମଚାରୀମାନେ ପ୍ରଭାବିତ ହେବେ । ନୂଆ ବଜାରରେ ପ୍ରବେଶ, ନୂଆ ପ୍ରଯୁକ୍ତିରେ ବିନିଯୋଗ ଏବଂ କୃତ୍ରିମ ବୁଦ୍ଧିମତ୍ତା (AI) ବ୍ୟବହାର ପାଇଁ କର୍ମଚାରୀମାନଙ୍କୁ ପୁନଃ ପ୍ରଶିକ୍ଷିତ କରାଯାଉଛି ଓ ପୁନଃ ନିୟୋଜନ ହେଉଛି । କିନ୍ତୁ ଏହି ପ୍ରକ୍ରିୟାରେ ପ୍ରାୟ 12,200ଟି ନିଯୁକ୍ତି ଉଚ୍ଛେଦ କରାଯିବ । ତେବେ ଏହାଦ୍ବାରା କଂପାନୀ ନିଜ ଗ୍ରାହକମାନଙ୍କ ସେବାରେ ଯେପରି କୌଣସି ବାଧା ସୃଷ୍ଟି ନ ହେବ, ସେଥିପାଇଁ ଧ୍ୟାନ ଦେବ ବୋଲି କହିଛି ।
ଭାରତର 283 ବିଲିୟନ୍ ଡଲାରର IT ଖାତା, ଦୁର୍ବଳ ଚାହିଦା, ଲମ୍ବାସ୍ଥାୟୀ ମୂଲ୍ୟସ୍ଫୀତି ଓ ଯୁକ୍ତରାଷ୍ଟ୍ରର ବ୍ୟାପାର ନୀତି ସମ୍ପର୍କୀୟ ଅନିଶ୍ଚିତତାର ପରିଣାମରେ, ଗ୍ରାହକମାନଙ୍କ ପକ୍ଷରୁ ଅଗ୍ରାହ୍ୟ ପ୍ରଯୁକ୍ତି ବ୍ୟୟ ପାଇଁ ଏଭଳି ନିଷ୍ପତ୍ତି ନେବାକୁ ପଡିଛି ବୋଲି କଂପାନୀ ସଫେଇ ଦେଇଛି । ଟିସିଏସର ମୁଖ୍ୟ କାର୍ଯ୍ୟ ନିର୍ବାହୀ କେ. କୃଥିଭାସନ୍ କହିଛନ୍ତି, ଗ୍ରାହକମାନଙ୍କ ନିଷ୍ପତ୍ତି ନେବାରେ ଏବଂ ପ୍ରକଳ୍ପ ଆରମ୍ଭରେ ବିଳମ୍ବ ଦେଖାଦେଇଥିବାରୁ କଂପାନୀକୁ କେତେକ ନୀତିଗତ ନିଷ୍ପତ୍ତି ନେବାକୁ ପଡୁଛି ।
