ଗୁଣି ଗାରେଡିକୁ ନେଇ ମର୍ଡର

ଗୁଣି ଗାରେଡିକୁ ନେଇ ଡବଲ ମର୍ଡର । ଗଡିଗଲା ଦୁଇ ଦୁଇଟା ମୁଣ୍ଡ । ଠେଙ୍ଗା ଓ ପଥରରେ ମୁଣ୍ଡକୁ ଛେଚି ଏଭଳି ବିଭତ୍ସ ହତ୍ୟାକାଣ୍ଡ ଘଟାଇଛି ହତ୍ୟାକାରୀ । ଏଭଳି ଲୋମ ଟାଙ୍କୁରା ଘଟଣା ଘଟିଛି ରାୟଗଡା ଜିଲ୍ଲା ଅମ୍ବାଦଳା ଥାନା ଅନ୍ତର୍ଗତ ସୁକଲାଭଟ୍ଟା ଗାଁରେ । କୌଣସି ଏକ ରୋଗରେ ଏହି ଗାଁର କରୁଣା ନାୟକଙ୍କ ସମ୍ପର୍କିୟ ମୃତୁ୍ୟବରଣ କରିବା ପରେ ଗୁଣିଗାରେଡିର ସନେ୍ଦହ ଘନିଭୁତ ହେବାକୁ ଲାଗିଲା । ଆଉ ସେହି ଗାଁର ମକର ନାୟକଙ୍କ ଉପରେ ସନେ୍ଦହ କଲେ କରୁଣା ନାୟକ । ସନେ୍ଦହ ଏତେ ତୀବ୍ରତର ହେଲା ଯେ, ମକରଙ୍କୁ ଧମକଚମକ ଦେଲେ କରୁଣା । ଗୁରୁବାର ସଂନ୍ଧ୍ୟାରେ କରୁଣା ନାୟକ ମକର ନାୟକଙ୍କୁ ଧମକ ଦେବା ସହ ଗାଁ ପାଖ ଏକ ବିଲରେ ମାରଧର କରିଥିବା କୁହାଯାଉଛି । ପରେ ସେ ଏକ ଠେଙ୍ଗାରେ ନିସ୍ତୁକ ମାଡ ମାରିବା ସହ ପଥରରେ ଛେଚି ହତ୍ୟା କରିଥିବା ଅଭିଯୋଗ ହୋଇଛି । ଏହି ଘଟଣା ପରେ କରୁଣା କୁଆଡେ ହାତରେ ଠେଙ୍ଗା ଧରି ଗାଁ ଦାଣ୍ଡରେ ସେ ମକରକୁ ହତ୍ୟା କରିଛନ୍ତି ବୋଲି କହି ବୁଲିଲେ । ଆଉ କରୁଣାଙ୍କ ଏଭଳି ବାତୁଳାମି ମୃତ ମକର ନାଏକର ଭାଇ ନକୁଳର କାନରେ ପଡିଥିଲା । କିଛି ସାଙ୍ଗକୁ ଧରି ନକୁଳ ପହଞ୍ଚି ଯାଇଥିଲା ଗାଁ ଦାଣ୍ଡରେ । ସାଙ୍ଗଙ୍କ ସହିତ ମିଶି ନକୁଳ କରୁଣାକୁ ହତ୍ୟା କରିଥିବା ଅଭିଯୋଗ ହୋଇଛି । ଏହି ଘଟଣା ପରେ ପୋଲିସ ଦୁଇଟି ଯାକ ମୃତଦେହ ଜବତ କରିବା ସହ ନକୁଳକୁ ଗିରଫ କରିଛି ।