ପଛରେ ରହିଗଲା ବିଜେଡି । ଶଙ୍ଖକୁ ପଛରେ ପକାଇ ବାଜି ମାରିଲେ ସୂର୍ଯ୍ୟବଂଶୀ । ଧାମନଗରବାସୀଙ୍କ ହୃଦୟ ଜିତିନେଲେ ୨୭ ବର୍ଷୀୟ ଯୁବ ପ୍ରାର୍ଥୀ । ବିଜେପିର ବଡ ବିଜୟ ପରେ ସବୁଠି ଉତ୍ସାହ, ସେଲିବ୍ରେସନର ମାହୋଲେ । ଉପନିର୍ବାଚନରେ ପ୍ରଥମ ଥର ବିଜେପି ବାଜି ମାରିଥିବାରୁ କର୍ମୀଙ୍କ ମଧ୍ୟରେ ନାହିଁ ନଥିବା ଉତ୍ସାହ । ବିଜେଡି ପ୍ରାର୍ଥୀ ଅବନ୍ତିଙ୍କୁ 9,881 ଖଣ୍ଡ ଭୋଟରେ ପରାସ୍ତ କରି ବିଜେପି ପ୍ରାର୍ଥୀ ସୂର୍ଯ୍ୟବଂଶୀ ସୂରଜ ବିଜୟ ଲାଭ କରିଛନ୍ତି ।
ଅନ୍ୟପକ୍ଷରେ ଦୁଇ ଦଶନ୍ଧି ଧରି କୌଣସି ଉପନିର୍ବାଚନ ହାରି ନ ଥିବା ବିଜେଡିକୁ ଉପନିର୍ବାଚନରେ ପ୍ରଥମ ପରାଜୟ ବରଣ କରିବାକୁ ପଡିଛି । ପୂର୍ବତନ ବିଧାୟକ ରାଜେନ୍ଦ୍ର ଦାସଙ୍କୁ ପ୍ରାର୍ଥୀ ନ କରିବା ବିଜେଡି ପାଇଁ ମହଙ୍ଗା ସାବ୍ୟସ୍ତ ହୋଇଛି । ବିଜେଡି ଅବନ୍ତି ଦାସଙ୍କୁ ପ୍ରାର୍ଥୀ ଘୋଷଣା କରିବା ପରେ ରାଜେନ୍ଦ୍ର ଦାସ ସ୍ବାଧୀନ ପ୍ରାର୍ଥୀ ଭାବେ ମଇଦାନକୁ ଓହ୍ଲାଇଥିଲେ । ପ୍ରାୟ 8 ହଜାରରୁ ଅଧିକ ଭୋଟ ପାଇ ରାଜେନ୍ଦ୍ର ତୃତୀୟ ସ୍ଥାନରେ ରହିବା ସହ ବିଜେଡି ପରାଜୟର ମୁଖ୍ୟ କାରଣ ହୋଇଛନ୍ତି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି, କଂଗ୍ରେସ ପ୍ରାର୍ଥୀ ମାତ୍ର 3 ହଜାର ଭୋଟ ପାଇବା ସହ ଅମାନତ ହରାଇଛନ୍ତି ।
