ଆସନ୍ତା 14 ତାରିଖରେ କଂଗ୍ରେସ ନେତା ରାହୁଲ ଗାନ୍ଧୀ ଇମ୍ଫାଲରୁ ଆରମ୍ଭ କରିବେ ଭାରତ ଯୋଡୋ ନ୍ୟାୟ ଯାତ୍ରା । ଜାନୁଆରୀ 14ରୁ ମାର୍ଚ୍ଚ 20 ତାରିଖ ପର୍ଯ୍ୟନ୍ତ ରାହୁଲ 15ଟି ରାଜ୍ୟର ଶହେଟି ଲୋକସଭା ନିର୍ବାଚନ ମଣ୍ଡଳୀ ଦେଇ ପଦଯାତ୍ରା କରିବେ । ଏହି ଯାତ୍ରାରେ ଓଡିଶାର ଚାରୋଟି ଜିଲ୍ଲାକୁ ସାମିଲ କରାଯାଇଛି । କଂଗ୍ରେସ ପକ୍ଷରୁ ପ୍ରସ୍ତୁତ କରାଯାଇଥିବା ରାହୁଲଙ୍କ ପଦଯାତ୍ରା କାର୍ଯ୍ୟକ୍ରମରେ ରାହୁଲ ଜାମସେଦପୁର ଦେଇ ଓଡିଶାର କେନ୍ଦୁଝର ଜିଲ୍ଲାରେ ପ୍ରବେଶ କରିବେ । କେନ୍ଦୁଝର, ସୁନ୍ଦରଗଡ, ସମ୍ବଲପୁର ଓ ଝାରସୁଗୁଡା ଦେଇ ସେ ଛତିଶଗଡ ଯିବେ । ତେବେ ଓଡିଶାରେ ସେ ପ୍ରାୟ 341 କିଲୋମିଟର ପଦଯାତ୍ରା କରିବେ ବୋଲି ସ୍ଥିର କରାଯାଇଛି । କଂଗେସ ସାଧାରଣ ସଂପାଦକ ଜୟରାମ ରମେଶ ଦେଇଥିବା ସୂଚନା ଅନୁଯାୟୀ ରାହୁଲଙ୍କ ଏହି ପଦଯାତ୍ରା ପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି । ଓଡିଶାରେ ରାହୁଲ ଗାନ୍ଧି କେଉଁ ମାର୍ଗ ଦେଇ ପଦଯାତ୍ରା କରିବେ, ତାହା ସ୍ଥିର କରିବା ପାଇଁ କଂଗ୍ରେସର ଏକ ଟିମ୍ ଖୁବଶୀଘ୍ର ଓଡିଶା ଆସି ଚୂଡାନ୍ତ କରିବେ ବୋଲି ପିସିସି ସଭାପତି ଶରତ ପଟ୍ଟନାୟକ କହିଛନ୍ତି ।
