ଗତକାଲି ଭୁବନେଶ୍ୱର ସିଆରପି ଛକରେ ଖେଳିଯାଇଥିଲା ଚାଞ୍ଚଲ୍ୟ । କିଛି ସମୟ ପାଇଁ ରଣକ୍ଷେତ୍ର ପାଲଟିଥିଲା ସିଆରପି ଛକ । ଆକ୍ରମଣ କରିଥିବା ଦୁଇ ଭାଇଙ୍କୁ ସ୍ଥାନୀୟ ଲୋକେ ନିର୍ଧୁମ ଛେଚିଥିଲେ । ପିସିଆର ଭ୍ୟାନର କାଚକୁ ଭାଙ୍ଗି ଦୁଇ ଆକ୍ରମଣକାରୀଙ୍କୁ ଘୋଷାଡି ଆଣି ମାଡ ମାରିଥିଲେ । ନାକେଦମ ହୋଇଯାଇଥିଲା ପୋଲିସ । ତେବେ ହତ୍ୟାକାରୀକୁ ମାଡ ମାରିଥିବା ୫ ଜଣ ସାଧାରଣ ଲୋକଙ୍କୁ ଗିରଫ କରିଛି ନୟାପଲ୍ଲୀ ଥାନା ପୋଲିସ । ଘଟଣାସ୍ଥଳରେ ପିସିଆର ଭ୍ୟାନ ଭଙ୍ଗାରୁଜା ଓ ହତ୍ୟାକାରୀଙ୍କୁ ମାଡ ମାରିଥିବା ବ୍ୟକ୍ତିଙ୍କୁ ପୋଲିସ ଚିହ୍ନଟ କରିଛି । ଭିଡିଓ ଫୁଟେଜ ଆଧାରରେ ପୋଲିସ ଏହି ୫ ଜଣଙ୍କୁ ଚିହ୍ନଟ କରିଛି । ଏ ସମ୍ପର୍କରେ ପୋଲିସ ପୃଥକ ମାମଲା ମଧ୍ୟ ରୁଜୁ କରିଛି । ରାଜଧାନୀରେ ବିଶୃଙ୍ଖଳିତ ଆଚରଣ ବରଦାସ୍ତ କରାଯିବ ନାହିଁ ବୋଲି ଡିସିପି କହିଛନ୍ତି । ତେବେ ଗତକାଲି ହତ୍ୟା ଘଟଣାରେ ଦୁଇ ଭାଇଙ୍କୁ ଗିରଫ କରିଛି ପୋଲିସ ।
