ଭୁବନେଶ୍ୱର:ଦକ୍ଷିଣ-ପୂର୍ବ ଓ ସଂଲଗ୍ନ ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି। ଅକ୍ଟୋବର ୨୩ ସୁଦ୍ଧା ଏହା ଗଠନ ହୋଇପାରେ ବୋଲି ଆକଳନ କରାଯାଉଛି।ଭାରତୀୟ ପାଣିପାଗ ବିଭାଗ (IMD)ର ଆକଳନ ଅନୁସାରେ, ଲଘୁଚାପଟି ଉତ୍ତର-ପଶ୍ଚିମ ଦିଗକୁ ଗତି କରିବା ସହ ଧୀରେ ଧୀରେ ଘନୀଭୂତ ହୋଇପାରେ। ଅନ୍ୟପଟେ, ଆମେରିକୀୟ GFS ଓ ୟୁରୋପୀୟ ECMWF ପାଣିପାଗ ମଡେଲ୍ ଅକ୍ଟୋବର ୨୪ରୁ ୨୮ ମଧ୍ୟରେ ଏହା ବାତ୍ୟାର ରୂପ ନେବାର ସମ୍ଭାବନା ଦର୍ଶାଉଛନ୍ତି। ତେବେ ବିଭିନ୍ନ ମଡେଲ୍ର ଆକଳନରେ ଭିନ୍ନତା ରହିଛି।ବର୍ତ୍ତମାନ ସ୍ଥିତିରେ ଓଡ଼ିଶା ପାଇଁ କୌଣସି ତତ୍କାଳୀନ ବାତ୍ୟା ବିପଦ କିମ୍ବା ଅଧିକାରିକ ବାତ୍ୟା ସତର୍କତା ଜାରି ହୋଇନାହିଁ। ତେବେ ଅକ୍ଟୋବର ୨୬ ଓ ୨୭ ତାରିଖ ପାଇଁ କିଛି ଉପକୂଳବର୍ତ୍ତୀ ଓ ସଂଲଗ୍ନ ଜିଲ୍ଲାରେ ବଜ୍ରପାତ ସହ ଘଡ଼ଘଡ଼ି ଏବଂ ଘଣ୍ଟାପ୍ରତି ୩୦ରୁ ୪୦ କିଲୋମିଟର ବେଗରେ ଝଟକା ପବନ ବହିବା ନେଇ ୟେଲୋ ଆଲର୍ଟ ଜାରି ହୋଇଥିବା ସୂଚନା ମିଳିଛି।ପାଣିପାଗ ବିଶେଷଜ୍ଞଙ୍କ ମତରେ, ଅକ୍ଟୋବର ୨୫ ପରେ ଲଘୁଚାପର ସ୍ଥିତି ଅଧିକ ସ୍ପଷ୍ଟ ହେବ। ଏହାର ତୀବ୍ରତା, ଗତିପଥ ଓ ସ୍ଥଳଭାଗ ଛୁଇଁବାର ସମ୍ଭାବନା ସମ୍ପର୍କରେ ସେତେବେଳେ ଅଧିକ ସଠିକ୍ ଆକଳନ କରାଯାଇପାରିବ।
