ଇଦ୍ ଅବସରରେ ଆଜି ମୁକ୍ତିଲାଭ କରିଛି ବଲିଉଡ଼ର ସୁପରଷ୍ଟାର ସଲମାନ ଖାନଙ୍କ ବହୁ ଚର୍ଚ୍ଚିତ ଫିଲ୍ମ “ଭାରତ” । ବକ୍ସ ଅଫିସରେ ଧମାକାଦାର ଓପନିଙ୍ଗ କରିଛି ଏହି ଫିଲ୍ମଟି । ସଲମାନ ଖାନଙ୍କ ଏହି ଫିଲ୍ମ ଦେଖିବାକୁ ଦର୍ଶକଙ୍କ ମନରେ ବେଶ୍ ଉତ୍ସାହ ଦେଖାଦେଇଛି । ଫିଲ୍ମ “ଭାରତ”ରେ ସଲମାନଙ୍କ ସହ ଦିଶା ପାଟନୀ ଓ କ୍ୟାଟ୍ରିନା କୈଫ ମୁଖ୍ୟ ଭୂମିକାରେ ନଜର ଆସିଛନ୍ତି । ଅଲ୍ଲୀ ଅବାସ ଜଫରଙ୍କ ଦ୍ୱାରା ନିର୍ମିତ ଏହି ଫିଲ୍ମକୁ ନେଇ ସାରା ଭାରତରେ ଲାଗିଛି ଜବରଦସ୍ତ କ୍ରେଜ୍ । ଫିଲ୍ମ ରିଲିଜ୍ ହେବା ପୂର୍ବରୁ ହିଁ ବାରିହୋଇ ପଡିଥିଲା ଭାଇଜାନଙ୍କ କ୍ରେଜ୍ । କାରଣ ନାସିକରେ ସଲମାନଙ୍କ ଜଣେ ପ୍ରଶଂସକ ଫିଲ୍ମ ପାଇଁ ପୁରା ଥିଏଟର ବୁକ୍ କରିଥିଲେ ।
ଏଠାରେ ସୂଚନାଯୋଗ୍ୟ ରିଲିଜ୍ ପୂର୍ବରୁ ଅଡୁଆରେ ପଡିଯାଇ ଥିଲେ ‘ଭାରତ’ ଫିଲ୍ମର ନିର୍ମାତା । କାରଣ ଦିଲ୍ଲୀର ଜଣେ ସଦସ୍ୟ ଫିଲ୍ମର ଶୀର୍ଷକ ଦେଶ ଭକ୍ତିର ଭାବନାକୁ ଭଙ୍ଗ କରୁଛି ଦର୍ଶାଇ ଦିଲ୍ଲୀ ଉଚ୍ଚ ନ୍ୟାୟଳୟରେ ଏକ ମାମଲା ରୁଜ୍ଜୁ କରିଥିଲେ । ତେବେ ସବୁ ଅପେକ୍ଷାର ଅନ୍ତ ଘଟାଇ ପରଦାରେ ମୁକ୍ତିଲାଭ କରିଛି ‘ଭାରତ’ ।
