ଗାଜାରେ ଇସ୍ରାଏଲୀ ବିମାନ ଆକ୍ରମଣରେ ୨୦ ଜଣଙ୍କର ମୃତ୍ୟୁ ଘଟିଛି ଓ ୮୦ରୁ ଅଧିକ ଆହତ ହୋଇଛନ୍ତି। ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ ପ୍ରଥମ ଆକ୍ରମଣ ରିମାଲ ଅଞ୍ଚଳରେ ଏକ କାରକୁ ଟାର୍ଗେଟ କରି ସେଥିରେ ନିଆଁ ଲଗାଇ ଦିଆଯାଇଥିଲା ଏବଂ ଏହି ଆକ୍ରମଣରେ ପାଞ୍ଚ ଜଣଙ୍କର ମୃତ୍ୟୁ ହୋଇଥିଲା। ଦୁଇ ବର୍ଷର ଯୁଦ୍ଧ ପରେ ଅକ୍ଟୋବର ୧୦ରେ ଇସ୍ରାଏଲ ଏବଂ ହମାସ ମଧ୍ୟରେ ଆମେରିକାର ମଧ୍ୟସ୍ଥତାରେ ହୋଇଥିବା ଅସ୍ତ୍ରବିରତି ଚୁକ୍ତିନାମା ପରେ ଶନିବାର ସବୁଠାରୁ ଭୟଙ୍କର ଦିନ ଥିଲା।ଆକ୍ରମଣର କିଛି ସମୟ ପରେ ଇସ୍ରାଏଲ ଦେଇର ଅଲ-ବାଲାହ ସହରର ଦୁଇଟି ଘର ଏବଂ ନୁସେରାଟ ଶିବିରରେ ଦୁଇଟି ପୃଥକ ବିମାନ ଆକ୍ରମଣ କରିଥିଲା, ଯେଉଁଥିରେ ୧୦ ଜଣଙ୍କର ମୃତ୍ୟୁ ହୋଇଥିଲା। ଶନିବାର ମଧ୍ୟ ପଶ୍ଚିମ ଗାଜାରେ ଏକ ଘରେ ଇସ୍ରାଏଲୀ ବିମାନ ଆକ୍ରମଣରେ ପାଞ୍ଚ ଜଣ ପାଲେଷ୍ଟାଇନୀଙ୍କ ମୃତ୍ୟୁ ହୋଇଥିଲା। ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ କାର୍ଯ୍ୟାଳୟ ହମାସକୁ ଯୁଦ୍ଧବିରତି ଚୁକ୍ତିନାମା ଉଲ୍ଲଂଘନ କରିଥିବା ଅଭିଯୋଗ କରିଛି। ଇସ୍ରାଏଲୀ ସେନା କହିଛି ଯେ ଜଣେ ବନ୍ଧୁକଧାରୀ ଗାଜାରେ ଇସ୍ରାଏଲୀ-ଅଧିକୃତ ଅଞ୍ଚଳରେ ପ୍ରବେଶ କରିଛି, ଯାହା ଦକ୍ଷିଣ ଗାଜାରେ ମାନବିକ ସହାୟତା ପହଞ୍ଚିବାକୁ ଅନୁମତି ଦିଏ। ଇସ୍ରାଏଲ ଏହାକୁ ଯୁଦ୍ଧବିରତିର ଏକ ସ୍ପଷ୍ଟ ଉଲ୍ଲଂଘନ ବୋଲି କହିଛି। ଇସ୍ରାଏଲ ଦାବି କରିଛି ଯେ ଗାଜାରେ ହୋଇଥିବା ଆକ୍ରମଣ ପ୍ରତିଶୋଧମୂଳକ ଥିଲା। ଅନ୍ୟପଟେ, ହମାସ ଇସ୍ରାଏଲୀ ସେନାର ସମସ୍ତ ଅଭିଯୋଗକୁ ଖଣ୍ଡନ କରିଛି। ଦୁଇ ବର୍ଷର ଲମ୍ବା ଯୁଦ୍ଧ ପରେ ଅକ୍ଟୋବର ୧୦ରେ ଯୁଦ୍ଧବିରତି ପରେ ମଧ୍ୟ ହିଂସା ସମ୍ପୂର୍ଣ୍ଣ ଭାବରେ ବନ୍ଦ ହୋଇନାହିଁ । ସେମାନେ ମଧ୍ୟସ୍ଥତାକାରୀଙ୍କୁ ପୁଣିଥରେ ଅନୁରୋଧ କରିଛନ୍ତି ଯେ ହମାସକୁ ଯୁଦ୍ଧବିରତି ପ୍ରତିଶ୍ରୁତି ପୂରଣ କରିବାକୁ ଜୋର ଦିଅନ୍ତୁ।।ଇସ୍ରାଏଲ ଦାବି କରିଛି ଯେ ସେମାନେ ଯୁଦ୍ଧବିରତିକୁ ପୂରାପୁରି ସମ୍ମାନ କରୁଛନ୍ତି ଏବଂ ହମାସ ଏହାକୁ ଉଲଂଘନ କରୁଛି। ଇସ୍ରାଏଲୀ ସେନାର କଥା ଅନୁଯାୟୀ, ଯୁଦ୍ଧବିରତି ଚାଲିଥିବା ସମୟରେ ହମାସର ଆତଙ୍କବାଦୀ ସୀମା ଅତିକ୍ରମ କରି ସୈନ୍ୟମାନଙ୍କୁ ଆକ୍ରମଣ କରିଥିଲେ।
