ରାଜଧାନୀର ବିଚ୍ ରାସ୍ତାରେ ଦାଦାଗିରି । ସାମାନ୍ୟ ଯୁକ୍ତିତର୍କ ପାଇଁ ଉଠିଲା ବନ୍ଧୁକ । ରାଜଧାନୀ ଭୁବନେଶ୍ୱରରେ ଦିନ ଦ୍ୱିପହରରେ ଘଟିଛି ଏଭଳି ଘଟଣା । ତେବେ ରସୁଲଗଡ ଛକରେ ଗାଡି ସାମ୍ନାରୁ ହଟାଇବା ପାଇଁ ଯୁବକଙ୍କୁ କହିଥିଲେ ଅନ୍ୟ ଏକ ଯୁବକ । ତେବେ ଏନେଇ ଯୁକ୍ତି ତର୍କ ହେବାପରେ ରାଗିଯାଇ ବନ୍ଧୁକ ଦେଖାଇଥିଲେ ଯୁବକ ଜଣଙ୍କ । ସ୍ଥାନୀୟ ଲୋକ ଯୁବକକୁ କାବୁ କରି ମାଡ଼ ମାରିବା ସହିତ ପୋଲିସକୁ ଜିମା ଦେଇଛନ୍ତି । ଅଭିଯୁକ୍ତ ଜଣକ ହେଲେ ଅରବିନ୍ଦ ମିତ୍ର । ସେ ନିଜକୁ ଜଣେ ସାମ୍ବାଦିକ ବୋଲି ପରିଚୟ ଦେଇଥିବା ଜଣାପଡ଼ିଛି । ପ୍ରଦ୍ୟୁମ୍ନ କୁମାର ଶ୍ରୀଚନ୍ଦନ ରାୟ ନାମକ ଜଣେ ବ୍ୟକ୍ତି ଆମ୍ବୁଲାନ୍ସ ପାଇଁ ବାଟ ଦେଖାଉଥିବା ବେଳେ ନିଜ ଗାଡ଼ିକୁ ରାସ୍ତାରେ ପାର୍କିଂ କରିଥିଲେ । ସାମ୍ନାରୁ ଗାଡ଼ି ହଟାଇବାକୁ ଅରବିନ୍ଦ ପ୍ରଦ୍ୟୁମ୍ନଙ୍କୁ କହିଥିଲେ । ଏହାକୁ ନେଇ ଦୁଇ ଜଣଙ୍କ ମଧ୍ୟରେ ଜୋର୍ସୋରରେ ପାଟିତୁଣ୍ଡ ହୋଇଥିଲା । ଏହା ପରେ ପ୍ରଦ୍ୟୁମ୍ନ ପକେଟ୍ରୁ ଏକ ବନ୍ଧୁକ ବାହାର କରି ପ୍ରଦ୍ୟୁମ୍ନଙ୍କ ମୁଣ୍ଡରେ ଲଗାଇ ଭୟଭୀତ କରାଇଥିଲେ । ଏହାକୁ ଦେଖି ସ୍ଥାନୀୟ ଲୋକ କୌଶଳ କ୍ରମେ ଅରବିନ୍ଦଙ୍କୁ କାବୁ କରି ନେଇଥିଲେ । ଏହା ପରେ ମାଡ଼ ମାରି ମଞ୍ଚେଶ୍ୱର ପୋଲିସ ଜିମା ଦେଇଛନ୍ତି । ପୋଲିସ ତାଙ୍କ ନିକଟରୁ ସମ୍ପୃକ୍ତ ବନ୍ଧୁକ ଜବତ କରି ତାଙ୍କୁ ଅଟକ ରଖି ପଚରାଉଚରା କରୁଛି ।
