ଢେଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ବେଲଟିକିରିସ୍ଥିତ ‘ଗୁଡ୍ ନିୟୁଜ୍ ଇଣ୍ଡିଆ ଡ୍ରିମ୍ସ ସେଣ୍ଟର” ପରିଚାଳିତ ସେଲଟର୍ ହୋମ୍ ବେଆଇନ. ଅର୍ଥାତ ସରକାରୀ ଅନୁମତି ନ ଥିଲା. ସେଲଟର ହୋମରେ ନିର୍ଯାତନା ଖବର ଆସିବା ପରେ ଏକଥା ସଫେଇ ଦେଇଛନ୍ତି ବିଭାଗୀୟ ମନ୍ତ୍ରୀ ପ୍ରଫୁଲ୍ଲ ସାମଲ. ସଂସ୍ଥାର ମାଲିକ ଓ କେୟାର ଟେକରଙ୍କୁ ଗିରଫ କରାଯାଇଛି ଏବଂ 62 ଜଣ ଅନ୍ତେବାସିନୀଙ୍କୁ ଅନ୍ୟତ୍ର ସ୍ଥାନାନ୍ତର କରିବାକୁ ନିର୍ଦ୍ଦେଶ ଦିଆଯାଇଛି. ମନ୍ତ୍ରୀ ପ୍ରଫୁଲ୍ଲ ସାମଲଙ୍କ ଏହି ବକ୍ତବ୍ୟ ସ୍ପଷ୍ଟ କରିଦେଇଛି, ସରକାରୀ ବିନା ଅନୁମତିରେ ଚାଲିଥିଲା ସେଲଟର ହୋମ୍. ଆଶ୍ଚର୍ଯ୍ୟର ବିଷୟ ହେଉଛି, ଗତ 6 ବର୍ଷ ହେଲାଣି ସେଲଟର ହୋମ୍ ଚାଲିଛି. ବିରାଟ ଜମି ଉପରେ ଦୁଇ ମହଲା ଘର ନିର୍ମିତ ହୋଇ ସେଲଟର ହୋମ ଚାଲିଥିଲେ ବି ସରକାରୀ ଦୃଷ୍ଟି ଆଢୁଆଳରେ ରହିଲା କେମିତି ? ଏଥିରୁ ଜିଲ୍ଲା ପ୍ରଶାସନ କେମିତି କାମ କରୁଛି, ତାହା ଅନୁମେୟ. ଛ ବର୍ଷ ଧରି ସେଲଟର ହୋମରେ ଚାଲିଥିବା ଯୌନ ନିର୍ଯାତନା ପାଇଁ ପ୍ରଶାସନିକ ଅଧିକାରୀଙ୍କୁ କାହିଁକି ଦାୟୀ କରାଯିବନାହିଁ. ବିଭାଗୀୟ ବଡବାବୁମାନେ କରୁଥିଲେ କଣ ? ବିଭାଗୀୟ ଅଧିକାରୀ ଓ ଜିଲ୍ଲା ପ୍ରଶାସନିକ କଳ ସହ ଭିତିରି ସଂପର୍କ ନ ଥିଲା ଯେ ଏକଥାକୁ ଏଡାଇ ଦେଇ ହେବ ନାହିଁ. କେବଳ ସଂସ୍ଥାର କେୟାର ଟେକର ଓ ମାଲିକଙ୍କୁ ଗିରଫ କରି ହାତ ସଫା କଲେ ହେବ ନାହିଁ, ସରକାରୀ ଦରମା ନେଉଥିବା ବାବୁମାନଙ୍କ ଅବହେଳାରୁ ବର୍ଷ ବର୍ଷ ଧରି ସେଲଟର ହୋମରେ ଅନ୍ତେବାସିନୀ ନିର୍ଯାତିତା ହୋଇ ଆସୁଥିଲେ. ତେଣୁ ସରକାରୀ ବାବୁଙ୍କ ବିରୋଧରେ ବି କାର୍ଯ୍ୟାନୁଷ୍ଠାନ ହେବା ଦରକାର.
