ରାଜଧାନୀରେ ଲୁଟେରାଙ୍କ ଆତଙ୍କରାଜ

ରାଜଧାନୀରେ ଲୁଟେରାଙ୍କ ଲୁଟପାଟ । ଦିନ ହେଉ କି ରାତି ଲୁଟେରାଙ୍କୁ ଆଖିରୁ ଖସି ପାରୁନାହାଁନ୍ତି ଲୋକେ । ଶୁକ୍ରବାର ସକାଳେ ଚନ୍ଦ୍ରଶେଖରପୁର ଥାନା ଅନ୍ତର୍ଗତ ଶୈଳଶ୍ରୀବିହାର ଫେଜ୍-୭ରେ ଲୁଟେରାଙ୍କ ଆତଙ୍କରାଜ ଦେଖିବାକୁ ମିଳିଛି। ଦୁଇଟି ବାଇକ୍‌ରେ ଆସିଥିବା ପାଞ୍ଚ ଜଣ ଦୁର୍ବୃତ୍ତ ମର୍ଣ୍ଣିଂ ୱାକ୍ କରୁଥିବା ଜଣେ ମହିଳାଙ୍କ ବେକରେ କଟୁରି ଲଗାଇ ସୁନା ଚେନ୍‌ ଓ କାନଫୁଲ ଲୁଟ୍ କରି ନେଇଥିଲେ। ପ୍ରତିରୋଧ କରିବାକୁ ଆସିଥିବା ଉକ୍ତ ମହିଳାଙ୍କ ସ୍ୱାମୀଙ୍କୁ ଲୁଟେରାମାନେ କଟୁରିରେ ହାଣି ଦେଇଥିବା ଅଭିଯୋଗ ହୋଇଛି। ସ୍ୱାମୀ-ସ୍ତ୍ରୀଙ୍କ ଚିତ୍କାର ଶୁଣି ପଡ଼ୋଶୀ ଘରର ଜଣେ ବ୍ୟକ୍ତି ଦୌଡ଼ି ଆସିଥିଲେ। ତେବେ ଲୁଟେରାମାନେ ସେମାନଙ୍କୁ ମଧ୍ୟ ଛାଡ଼ି ନ ଥିଲେ। ତାଙ୍କ ଉପରକୁ ପଥର ଫିଙ୍ଗି ଥିଲେ। ଏହାସହ ତାଙ୍କୁ ମାରି ଦେବାକୁ ଧମକ ଦେଇଥିବା ଅଭିଯୋଗ ହୋଇଛି। ଲୁଟେରାଙ୍କ ପଥର ମାଡ଼ରେ ପଡୋଶୀଙ୍କ ଘରର କାଚ ଭାଙ୍ଗି ଯାଇଥିଲା। ଅଧଘଣ୍ଟା ଧରି ଲୁଟେରାମାନେ ଏହି ଆତଙ୍କରାଜ ଚଲାଇ ଥିଲେ ବୋଲି ଅଭିଯୋଗ ହୋଇଛି।