ଆମେରିକୀୟ ସେନା ଇରାନରେ ଦୁଇ ଦିନ ଧରି ସର୍ଚ୍ଚ ଅପରେସନ୍ ପରେ F-15 ଫାଇଟର୍ ଜେଟ୍ର ଚାଳକ ଦଳର ଦ୍ୱିତୀୟ ସଦସ୍ୟଙ୍କୁ ସୁରକ୍ଷିତ ଭାବେ ଉଦ୍ଧାର କରିଛି। ଶୁକ୍ରବାର ଦିନ ଏହି ଜେଟ୍କୁ ଇରାନ ଉପରେ ଖସାଇ ଦିଆଯାଇଥିଲା। ଏହି ସମୟରେ ବିମାନରେ ଥିବା ଦୁଇଜଣ କ୍ରୁ ସଦସ୍ୟ ଇଜେକ୍ଟ କରି ଇରାନ ମାଟିରେ ପଡ଼ିଥିଲେ। ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କୋର୍ପସ ଏହି ଦୁଇଜଣଙ୍କୁ ଧରିବା ପାଇଁ ପୁରା ପ୍ରୟାସ କରିଥିଲା କିନ୍ତୁ ଆମେରିକୀୟ ସେନା ଇରାନରୁ ନିଜର ଦୁଇ ପାଇଲଟଙ୍କୁ ଉଦ୍ଧାର କରିନେଲା । ଡୋନାଲ୍ଡ ଟ୍ରମ୍ପ ପାଇଲଟ୍ଙ୍କୁ ରେସକ୍ୟୁ କରାଯିବା ନେଇ ନିଶ୍ଚିତ କରିବା ସହ ଲେଖିଛନ୍ତି, “ଆମେ ତାଙ୍କୁ ବଞ୍ଚାଇ ଦେଲୁ। ମୋର ପ୍ରିୟ ଆମେରିକୀୟମାନେ, ବିଗତ କିଛି ଘଣ୍ଟା ମଧ୍ୟରେ ଆମେରିକୀୟ ସେନା ଆମର ଜଣେ ଶ୍ରେଷ୍ଠ କ୍ରୁ ମେମ୍ବର ଅଫିସରଙ୍କ ପାଇଁ, ଯିଏ କି ଜଣେ ଅତ୍ୟନ୍ତ ସମ୍ମାନିତ କର୍ଣ୍ଣଲ ମଧ୍ୟ, ଆମେରିକା ଇତିହାସର ସବୁଠାରୁ ସାହସିକ ସଂଧାନ ଏବଂ ଉଦ୍ଧାର ଅଭିଯାନ ମଧ୍ୟରୁ ଗୋଟିଏକୁ ସଫଳତାର ସହ ଶେଷ କରିଛି। ମୋତେ ଆପଣଙ୍କୁ ଜଣାଇବାରେ ଅତ୍ୟନ୍ତ ଖୁସି ଲାଗୁଛି ଯେ ସେ ଏବେ ସମ୍ପୂର୍ଣ୍ଣ ଭାବେ ସୁରକ୍ଷିତ ଏବଂ କୁଶଳ ଅଛନ୍ତି।” ପାଇଲଟ ଦୁଇ ଦିନ ପର୍ଯ୍ୟନ୍ତ ଇରାନରେ ବୁଲିବା ପରେ ଆମେରିକୀୟ ପାଇଲଟ୍ଙ୍କୁ ସୁରକ୍ଷିତ ଭାବେ ବାହାର କରି ଆଣିଛି । ରିପୋର୍ଟରେ କୁହାଯାଇଛି ଯେ ଆମେରିକୀୟ ସେନାର ରେସକ୍ୟୁ ଅପରେସନ୍ ଆରମ୍ଭ ହେବା ପୂର୍ବରୁ CIA ପ୍ରଥମେ ଏକ ବିଭ୍ରାନ୍ତକାରୀ ଅଭିଯାନ ଆରମ୍ଭ କରିଥିଲା। ଏହା ଅଧୀନରେ ଇରାନ ଭିତରେ ଏହି ଗୁଜବ ପ୍ରଚାର କରାଯାଇଥିଲା ଯେ ଆମେରିକୀୟ ସେନା ସେହି ଅଫିସରଙ୍କୁ ପୂର୍ବରୁ ହିଁ ଖୋଜି ବାହାର କରିଛି ଏବଂ ତାଙ୍କୁ ଦେଶରୁ ବାହାରକୁ ନେବା ପାଇଁ ସ୍ଥଳପଥରେ ନେଇଯାଉଛି। ଜଣେ ଆମେରିକୀୟ ଅଧିକାରୀଙ୍କ ସୂତ୍ରରୁ ଜଣାଇଛନ୍ତି ଯେ CIA ନିଜର ସ୍ୱତନ୍ତ୍ର କ୍ଷମତା ବ୍ୟବହାର କରି ‘ୱେପନ୍ ସିଷ୍ଟମ ଅଫିସର’ଙ୍କୁ ଖୋଜି ବାହାର କରିଥିଲା। ଅଧିକାରୀ ଜଣକ କହିଛନ୍ତି, ଏହା କୁଟାଗଦାରୁ ଛୁଞ୍ଚି ଖୋଜିବା ଭଳି ଏକ ଅତ୍ୟନ୍ତ କଷ୍ଟକର କାମ ଥିଲା। କିନ୍ତୁ ଏହି କ୍ଷେତ୍ରରେ ସେହି ଛୁଞ୍ଚି ଜଣେ ସାହସୀ ଆମେରିକୀୟ ସୈନିକ ଥିଲେ, ଯିଏ ପାହାଡ଼ର ଏକ ଗାତ ବା ଫାଟରେ ଲୁଚି ରହିଥିଲେ।ଅଧିକାରୀ କହିଛନ୍ତି ଯେ ୱେପନ୍ ସିଷ୍ଟମ ଅଫିସର ନିଜକୁ ଧରାପଡ଼ିବାରୁ ରକ୍ଷା କରିବା ପାଇଁ ଗୋଟିଏ ଦିନରୁ ଅଧିକ ସମୟ ପାହାଡ଼ରେ ଲୁଚାଇ ରଖିଥିଲେ। ଅଧିକାରୀ ଜଣକ କହିଛନ୍ତି ଯେ CIA ବ୍ୟତୀତ ଅନ୍ୟ କାହା ପାଇଁ ତାଙ୍କୁ ଦେଖିବା କଷ୍ଟକର ଥିଲା। CIA ତୁରନ୍ତ ସେହି ପାଇଲଟ୍ଙ୍କ ସଠିକ୍ ଲୋକେସନ୍ ପେଣ୍ଟାଗନ୍, ଆମେରିକୀୟ ସେନା ଏବଂ ହ୍ୱାଇଟ୍ ହାଉସ ସହିତ ସେୟାର୍ କରିଥିଲା। ଏହା ପରେ ରାଷ୍ଟ୍ରପତି ଟ୍ରମ୍ପ ତୁରନ୍ତ ଏକ ରେସକ୍ୟୁ ମିଶନ ଚଳାଇବାକୁ ନିର୍ଦ୍ଦେଶ ଦେଇଥିଲେ। ସମ୍ପୂର୍ଣ୍ଣ ଅପରେସନ୍ ସମୟରେ CIA ଏହି ଅଭିଯାନରେ ସାହାଯ୍ୟ ପାଇଁ କ୍ରମାଗତ ଭାବେ ରିୟଲ୍-ଟାଇମ୍ ସୂଚନା ଦେଇ ଚାଲିଥିଲା।ପ୍ରବଳ ଗୁଳିବିନିମୟ ମଧ୍ୟରେ ସ୍ପେଶାଲ ଫୋର୍ସ ପାଇଲଟ୍ଙ୍କୁ ସୁରକ୍ଷିତ ଭାବେ ଉଦ୍ଧାର କରି ନେଇଗଲା।
