ଭୁବନେଶ୍ୱର: ବହୁଚର୍ଚ୍ଚିତ ସିଏମ୍ଓରୁ ଫାଇଲ ହଜିବା ଘଟଣାରେ ପୋଲିସ ତଦନ୍ତକୁ ଜୋରଦାର କରିଛି। ଏହି ମାମଲାରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଓଏସଡି ତଥା ତତ୍କାଳୀନ ଆଇଟି ସଚିବ ମନୋଜ ମିଶ୍ର କ୍ୟାପିଟାଲ ଥାନାରେ ହାଜର ହୋଇଛନ୍ତି। କମିଶନରେଟ୍ ପୋଲିସ ପକ୍ଷରୁ ପୂର୍ବରୁ ତାଙ୍କୁ ସମନ ଜାରି କରାଯାଇଥିବା ବେଳେ ସେ ଆଜି କ୍ୟାପିଟାଲ ଥାନାରେ ହାଜର ହୋଇଛନ୍ତି । ପଚରାଉଚରା ଶେଷ ହେବା ପରେ ଥାନାରୁ ବାହାରି ଗଣମାଧ୍ୟମ ପ୍ରତିନିଧିମାନଙ୍କୁ ନିଜର ପ୍ରତିକ୍ରିୟା ଦେଇ ମନୋଜ ମିଶ୍ର କହିଛନ୍ତି ଯେ, ସେ ପୋଲିସର ତଦନ୍ତ ପ୍ରକ୍ରିୟାରେ ସମ୍ପୂର୍ଣ୍ଣ ସହଯୋଗ କରୁଛନ୍ତି। “ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଦୁଇଟି ଫାଇଲ ହଜିଥିବା ନେଇ ପୋଲିସ ନିକଟରେ ଅଭିଯୋଗ ହୋଇଛି। ଏହି ଘଟଣା ଘଟିବା ସମୟରେ ମୁଁ ଆଇଟି ବିଭାଗର ସଚିବ ଦାୟିତ୍ୱରେ ଥିଲି। ତେଣୁ ସେତେବେଳେ ଅଫିସିଆଲ୍ କାର୍ଯ୍ୟପ୍ରଣାଳୀ କିପରି ରହୁଥିଲା ଏବଂ ଫାଇଲ୍ ଗୁଡ଼ିକର ପରିଚାଳନା କିପରି ହେଉଥିଲା, ସେ ବିଷୟରେ ଜାଣିବା ପାଇଁ ପୋଲିସ ମୋତେ ଡାକିଥିଲା ଏବଂ ପୋଲିସ ମାଗିଥିବା ସମସ୍ତ ତଥ୍ୟ ମୁଁ ପ୍ରଦାନ କରିଛି।” ବୋଲି ସେ କହିଛନ୍ତି। ଫାଇଲ୍ ହଜିବା ଘଟଣାରେ ପୋଲିସ ପୂର୍ବ ସରକାର ସମୟରେ ସିଏମ୍ଓରେ କାର୍ଯ୍ୟରତ ଥିବା ଅନ୍ୟାନ୍ୟ ଅଧିକାରୀମାନଙ୍କୁ ମଧ୍ୟ ଡାକି ପଚରାଉଚରା କରୁଥିବା ଜଣାପଡ଼ିଛି।
