ନୂଆଦିଲ୍ଲୀ:ଦେଶର ସବୁ ଘରୋଇ ସାଟେଲାଇଟ୍ ଟିଭି ଚ୍ୟାନେଲ ପାଇଁ କଡ଼ା ମାର୍ଗଦର୍ଶିକା ଜାରି କରିଛି ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ।ମନ୍ତ୍ରଣାଳୟ ଚିନ୍ତା ପ୍ରକାଶ କରି କହିଛି ଯେ ଅନେକ ଟିଭି ଚ୍ୟାନେଲ୍ ଆଇନର ନିର୍ଦ୍ଧାରିତ ମାନଦଣ୍ଡ ଏବଂ ନିୟମର ଉଲ୍ଲଂଘନ କରୁଛନ୍ତି । ଏହି ମାର୍ଗଦର୍ଶିକା ଜରିଆରେ ଟିଭି ଚ୍ୟାନେଲଗୁଡ଼ିକୁ କେବୁଲ୍ ଟେଲିଭିଜନ୍ ନେଟୱାର୍କ (ରେଗୁଲେସନ)ଆକ୍ଟ ୧୯୯୫ ଏବଂ କେବୁଲ୍ ଟେଲିଭିଜନ୍ ନେଟୱାର୍କ ନିୟମ ୧୯୯୪ ଅଧିନରେ ତଥା ପ୍ରୋଗ୍ରାମ କୋଡ୍ କଡ଼ାକଡ଼ି ଅନୁପାଳନ କରିବା ଲାଗି ପରାମର୍ଶ ଦିଆଯାଇଛି ।ଅନେକ ଘରୋଇ ସାଟେଲାଇଟ୍ ଟିଭି ଚ୍ୟାନେଲ୍ ନିୟମାବଳୀକୁ ଉଲ୍ଲଂଘନ କରୁଥିବା ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ନଜରକୁ ଆସିଥିଲା । ଏହା ଉପରେ ଆନ୍ତଃବିଭାଗୀୟ କମିଟି (IDC)ର ଏକ ଗୁରୁତ୍ୱପୂର୍ଣ୍ଣ ବୈଠକ ହୋଇଥିଲା । ଏହି ସମୀକ୍ଷା ବୈଠକ ସମୟରେ, ଜଣାପଡ଼ିଥିଲା ଯେ ଅନେକ ଟିଭି ଚ୍ୟାନେଲ୍ ଏକପାଖିଆ ଏବଂ ବିସଙ୍ଗତ ଭାବରେ ଗୋଟିଏ ବିଷୟ ସହିତ ଜଡିତ ସମ୍ବେଦନଶୀଳ ଖବର ଏବଂ ଦୃଶ୍ୟ ପ୍ରସାରଣ କରୁଛନ୍ତି । ଆଇଡିସିର ସୁପାରିଶକୁ ଆଧାର କରି ଏହି ପରାମର୍ଶ ଜାରି କରାଯାଇଛି । ମାର୍ଗଦର୍ଶିକା ଅନୁଯାୟୀ ସୁରକ୍ଷା ବାହିନୀର ସିଧା ପ୍ରସାରଣ କିମ୍ବା ଆତଙ୍କବାଦ ବିରୋଧୀ ଅଭିଯାନ ସିଧା ପ୍ରସାରଣ କରାଯିବ ନାହିଁ ।,ଅପରାଧ, ଦୁର୍ଘଟଣା ଏବଂ ପ୍ରାକୃତିକ ବିପର୍ଯ୍ୟୟ ଉପରେ ରିପୋର୍ଟିଂ କରିବା ସମୟରେ ଅତ୍ୟଧିକ ଭୟଙ୍କର କିମ୍ବା ବିଚଳିତ କଲା ପରି ଦୃଶ୍ୟ ପ୍ରସାରଣରୁ ଦୂରେଇ ରହିବାକୁ ପରାମର୍ଶ ଦିଆଯାଇଛି l ସେହିପରି ବିତର୍କ ଏବଂ ପ୍ୟାନେଲ୍ ଆଲୋଚନା ସମୟରେ କୌଣସି ଧର୍ମ, ସମ୍ପ୍ରଦାୟ କିମ୍ବା ବର୍ଗ ବିରୁଦ୍ଧରେ ଘୃଣା ପ୍ରସାରଣ କରୁଥିବା କିମ୍ବା ଦେଶ ବିରୋଧୀ ଭାବନାକୁ ପ୍ରୋତ୍ସାହିତ କରୁଥିବା ବିଷୟବସ୍ତୁ ପ୍ରସାରଣ କୁ ବାରଣ କରାଯାଇଛି lପ୍ରସାରଣ ସମୟରେ ଭାରତର ସରକାରୀ ଏବଂ ସଠିକ୍ ମାନଚିତ୍ର ବ୍ୟବହାର ବାଧ୍ୟତାମୂଳକ ।ଯୌନ ଉତ୍ପୀଡ଼ନ ଏବଂ ଅପରାଧ ମାମଲାରେ, ସେମାନଙ୍କର ଗୋପନୀୟତା ଏବଂ ସୁରକ୍ଷାକୁ ସୁରକ୍ଷା ଦେବା ପାଇଁ ପୀଡିତଙ୍କ ପରିଚୟ ପ୍ରକାଶ ନକରିବାକୁ ନିର୍ଦ୍ଦେଶ ଦିଆଯାଇଛି । ଏହା ସହିତ ଖବର ପ୍ରସାରଣରେ ଏଆଇ ଏବଂ ଜେନେରେଟିଭ୍ ଏଆଇର ବର୍ଦ୍ଧିତ ବ୍ୟବହାର ସମ୍ପର୍କରେ ମନ୍ତ୍ରଣାଳୟ ପ୍ରସାରକମାନଙ୍କୁ ମଧ୍ୟ ସତର୍କ କରାଇଛି ।
