ଆଜିକାଲି ନିଜ ନିଜ କାମରେ ସମସ୍ତେ ବ୍ୟସ୍ତ । ସମାଜରେ ବହୁତ କମ ଲୋକ ଅଛନ୍ତି ଯେଉଁମାନେ ନିଜ କାର୍ଯ୍ୟବ୍ୟସ୍ତତା ଭିତରେ ବି ଅନ୍ୟକୁ ସାହାଯ୍ୟ କରିବାକୁ ଆଗେଇ ଆସନ୍ତି । ଏମିତି କିଛି ଦୃଶ୍ୟ ଦେଖିବାକୁ ମିଳିଛି ମଥୁରାରେ । ପ୍ରସବ ଯନ୍ତ୍ରଣାରେ ଛଟପଟ ହୋଉଥିବା ଏକ ଅନ୍ତସତ୍ତ୍ୱା ମହିଳାଙ୍କୁ କାନ୍ଧରେ ଉଠାଇ 100 ମିଟର ଦୂରରେ ଥିବା ହସ୍ପିଟାଲ ନେଇ ଚିକିତ୍ସା ପାଇଁ ଭର୍ତ୍ତି କରିଥିଲେ ଜଣେ ପୋଲିସ କର୍ମଚାରୀ । ସେଠାରେ ମହିଳା ଜଣକ ଏକ କନ୍ୟା ସନ୍ତାନକୁ ଜନ୍ମ ଦେଇଥିଲେ । ଘଟଣା ଅନୁଯାୟୀ ଏସଓ ଜିଆରପି ସୋନୁ କୁମାରଙ୍କୁ ଶୁକ୍ରବାର ମଥୁରାର ଏକ ଅଦାଲତରେ ପହଞ୍ଚିବାର ଥିଲା। ମଥୁରା ଷ୍ଟେସନରେ ଓହ୍ଲାଇବା ପରେ ସୋନୁ କୁମାର ସେଠାରେ ପ୍ରସବ ଯନ୍ତ୍ରଣାରେ ଛଟପଟ ହେଉଥିବା ଏକ ଅନ୍ତସତ୍ତ୍ୱା ମହିଳାଙ୍କୁ ଦେଖିବାକୁ ପାଇଥିଲେ । ହସ୍ପିଟାଲ ଯିବା ପାଇଁ ନା ଥିଲା ଆମ୍ବୁଲାନ୍ସ ଓ ଅନ୍ୟ କିଛି ସାଧନ । ଠିକ୍ ସମୟରେ ସୋନୁ କୁମାର ମହିଳାଙ୍କୁ ସାହାଯ୍ୟ କରିବା ପାଇଁ ଆଗକୁ ଆସିଥିଲେ ଏବଂ ତାଙ୍କୁ ସୁରକ୍ଷିତ ଡାକ୍ତରଖାନାରେ ପହଁଞ୍ଚାଇଥିଲେ । ଏହି ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଅନ୍ୟପକ୍ଷରେ ଏଭଳି କାର୍ଯ୍ୟ କରି ସମସ୍ତଙ୍କର ପ୍ରଶଂସାର ପାତ୍ର ପାଲଟିଛନ୍ତି ସୋନୁ କୁମାର ।
