ଓମାନ ଉପକୁଳରେ ଡ୍ରୋନ୍‌ ମାଡ଼ ଯୋଗୁଁ ସମୁଦ୍ରରେ ବୁଡ଼ିଲା ଭାରତୀୟ ଜାହାଜ

ନୂଆଦିଲ୍ଲୀ: ଭାରତୀୟ ମାଲବାହୀ ଜାହାଜ ‘ହାଜି ଅଲ୍ଲୀ’ ଉପରେ ସନ୍ଦିଗ୍ଧ ଡ୍ରୋନ୍‌ ମାଡ଼ ହେବା ଫଳରେ ଓମାନ ଉପକୁଳ ରେ ଏହା ସମୁଦ୍ରରେ ବୁଡ଼ିଯାଇଛି। ଏହି ଭୟଙ୍କର ଆକ୍ରମଣରୁ ଜାହାଜରେ ଥିବା ସମସ୍ତ ୧୪ ଜଣ ଭାରତୀୟ ନାବିକ ଅଳ୍ପକେ ବର୍ତ୍ତିଯାଇଛନ୍ତି। ଓମାନ କର୍ତ୍ତୃପକ୍ଷ ସେମାନଙ୍କୁ ସୁରକ୍ଷିତ ଭାବେ ଉଦ୍ଧାର କରିଛନ୍ତି। ଭାରତ ସରକାର ଏହି ଘଟଣାକୁ ଅତି ନିନ୍ଦନୀୟ ଓ ‘ଅଗ୍ରହଣୀୟ’ ବୋଲି ଅଭିହିତ କରିଛନ୍ତି। ବୁଧବାର ଭୋର ପ୍ରାୟ ୩:୩୦ ସମୟରେ ଓମାନର ଉତ୍ତର ଉପକୂଳ ‘ଲିମା’ ନିକଟରେ ଏହି ଆକ୍ରମଣ ହୋଇଥିଲା। ଗୁଜରାଟର ଦେବଭୂମି ଦ୍ୱାରକା ଜିଲା ସଲାୟା ବନ୍ଦରରେ ପଞ୍ଜୀକୃତ ଏହି ଜାହାଜଟି ସୋମାଲିଆରୁ ଶାରଜା ଅଭିମୁଖେ ଗୋରୁ ନେଇ ଯାଉଥିଲା। ଜାହାଜଟି ଗତି କରୁଥିବା ସମୟରେ ଏକ ଅଜ୍ଞାତ ବିସ୍ଫୋରକ ବସ୍ତୁ (ସନ୍ଦିଗ୍ଧ ଡ୍ରୋନ୍‌) ଏହାକୁ ଧକ୍କା ଦେଇଥିଲା। ଫଳରେ ଜାହାଜରେ ନିଆଁ ଲାଗିଯାଇଥିଲା ଏବଂ ଭାରସାମ୍ୟ ହରାଇ ଏହା ସମୁଦ୍ରରେ ବୁଡ଼ିବାକୁ ଲାଗିଥିଲା। ନିଆଁ ଚାରିଆଡ଼େ ବ୍ୟାପିଯିବା ପୂର୍ବରୁ ଜାହାଜର ୧୪ ଜଣ ଯାକ ନାବିକ ତୁରନ୍ତ ‘ଡିଷ୍ଟ୍ରେସ୍‌ ସିଗନାଲ’ ପଠାଇବା ସହ ଲାଇଫ୍‌ ସପୋର୍ଟ ସାହାଯ୍ୟରେ ଜାହାଜରୁ ବାହାରି ଆସିଥିଲେ। ଓମାନ କୋଷ୍ଟ ଗାର୍ଡ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରି ସମସ୍ତଙ୍କୁ ସୁରକ୍ଷିତ ଭାବେ ‘ଦୀବା’ ବନ୍ଦରକୁ ନେଇ ଆସିଥିଲେ। ଜାହାଜ ମାଲିକ ସୁଲତାନ ଅହମ୍ମଦ ସାଙ୍ଘାର ସମସ୍ତ କର୍ମଚାରୀ ସୁରକ୍ଷିତ ଥିବା ସ୍ପଷ୍ଟ କରିଛନ୍ତି। ବୈଦେଶିକ ବ୍ୟାପାର ମନ୍ତ୍ରଣାଳୟ ଏହି ଆକ୍ରମଣକୁ ନେଇ କଠୋର ଆଭିମୁଖ୍ୟ ଗ୍ରହଣ କରିଛି। ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ‘ଏକ ଭାରତୀୟ ପତାକାଧାରୀ ଜାହାଜ ଉପରେ ଆକ୍ରମଣ ସମ୍ପୂର୍ଣ୍ଣ ଅଗ୍ରହଣୀୟ। ବର୍ତ୍ତମାନ ଓମାନ କର୍ତ୍ତୃପକ୍ଷ ଏହି ଆକ୍ରମଣ ପଛରେ କାହାର ହାତ ରହିଛି, ସେନେଇ ତଦନ୍ତ ଜାରି ରଖିଛନ୍ତି।ଏହି ଆକ୍ରମଣ ଭାରତୀୟ ବ୍ୟବସାୟୀ ଓ ଜାହାଜ ମାଲିକମାନଙ୍କ ଚିନ୍ତା ବଢ଼ାଇ ଦେଇଛି।