ମୁମ୍ବାଇ: ରାହୁଲ ଗାନ୍ଧୀଙ୍କ ଫୋନ୍ ଟ୍ୟାପିଂ ସମ୍ପର୍କିତ ଅଭିଯୋଗକୁ ନେଇ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ପ୍ରଶ୍ନ ଉଠାଇଛନ୍ତି। ରାଜନୈତିକ ଭାବେ ନିଜ ସ୍ଥିତି ଦୁର୍ବଳ ହେଉଥିବାରୁ ଆଲୋଚନାରେ ରହିବା ପାଇଁ ରାହୁଲ ଏଭଳି ଅଭିଯୋଗ କରୁଥିବା ସେ କହିଛନ୍ତି। ତାଙ୍କ ମତରେ, ରାହୁଲଙ୍କ ପାଖରେ ନା ରହିଛି କୌଣସି ଠୋସ୍ ପ୍ରସଙ୍ଗ, ନା ଦେଶର ବିକାଶ ପାଇଁ ସ୍ପଷ୍ଟ ଦୃଷ୍ଟିକୋଣ ଏବଂ ନା ଅଭିଯୋଗକୁ ପ୍ରମାଣ କରିବା ପାଇଁ ଆବଶ୍ୟକ ତଥ୍ୟ।ସିନ୍ଦେ ଆହୁରି କହିଛନ୍ତି ଯେ, ରାହୁଲ ଗାନ୍ଧୀ ପ୍ରମାଣ ଥିବା କଥା କହୁଛନ୍ତି, କିନ୍ତୁ ସେଗୁଡ଼ିକୁ ସାର୍ବଜନୀନ କରୁନାହାନ୍ତି। ପ୍ରତିଦିନ ନୂଆ ଅଭିଯୋଗ ଆଣିବା ଏବଂ ନୂଆ ରାଜନୈତିକ ବୟାନ ତିଆରି କରିବା ହିଁ ତାଙ୍କର କାମ ହୋଇଯାଇଛି ବୋଲି ସେ ଆକ୍ଷେପ କରିଛନ୍ତି। ଏକନାଥ ସିନ୍ଦେ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ କରି ରାହୁଲ ଗାନ୍ଧୀଙ୍କୁ ଟାର୍ଗେଟ୍ କରିଛନ୍ତି। ତାଙ୍କ କହିବା ଅନୁସାରେ, ରାହୁଲ ଗାନ୍ଧୀ ଶୋଇଥିବା ବେଳେ ହେଉ କି ଉଠିବା ସମୟରେ, ସବୁବେଳେ କେବଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କଥା ଭାବୁଛନ୍ତି। ରାହୁଲ ଗାନ୍ଧୀ ‘ମୋଦୀ ଫୋବିଆ’ରେ ପୀଡ଼ିତ ବୋଲି କହି ସେ କଟାକ୍ଷ କରିଛନ୍ତି।
