ଗୁଣ୍ଡିଚା ମନ୍ଦିରରେ ଫୁଟିଲା ଗୁଳି

ବଡଦିନରେ ପୁରୀ ସହରରେ ଫୁଟିଲା ଗୁଳି । ମଙ୍ଗଳବାର ସକାଳ ୯ଟାରେ କୁମ୍ଭାରପଡା ଥାନା ଅଧୀନ ଗୁଣ୍ଡିଚା ମନ୍ଦିର ନାକଚଣା ଦ୍ୱାର ନିକଟରେ ଜଣେ ଯୁବକଙ୍କୁ ଗୁଳିମାଡ ହୋଇଛି । ଗୁଳିକାଣ୍ଡରେ ଦୁର୍ଦ୍ଦାନ୍ତ ଅପରାଧୀ ସଞ୍ଜୟ ବେହେରା ଓରଫ ପାରା ଗୁରୁତର ଆହତ ହୋଇଛନ୍ତି । ଗୁଳି ତାଙ୍କ ବାମ କାନ୍ଧରେ ବାଜିଛି । ଗୁରୁତର ଅବସ୍ଥାରେ ତାଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଛି। ପୂର୍ବ ଶତ୍ରୁତାକୁ କେନ୍ଦ୍ରକରି ଏହି ଗୁଳିମାଡ ହୋଇଥିବା ପ୍ରାଥମିକ ତଦନ୍ତରୁ ଜଣାପଡିଛି। ଘଟଣାର ତଦନ୍ତ ଆରମ୍ଭ ହୋଇଥିବା ଡିସିପି ପିକେ ପଟ୍ଟନାୟକ କହିଛନ୍ତି। ପୂର୍ବରୁ ଏକ ଦାଦାବଟି ମାଗିବା ଘଟଣାରେ ଜେଲ ଯାଇ ୨ ମାସ ହେବ ଜାମିନରେ ଆସିଥିଲେ ସଞ୍ଜୟ। ଗତବର୍ଷ ଭାଗୁ ପ୍ରଧାନଙ୍କୁ ଗୁଳିମାଡ ଘଟଣାରେ ସେ ଜେଲ୍‌ ଯାଇଥିଲେ। ପୁରୀ ପୋଲିସ ତାଙ୍କୁ ଏନକାଉଣ୍ଟର ମଧ୍ୟ କରିଥିଲା। ୨୫ରୁ ଊର୍ଦ୍ଧ୍ୱ ମାମଲାରେ ସେ ସମ୍ପୃକ୍ତ ଅଛନ୍ତି।
ସୁଚନାଅନୁସାରେ, ମଙ୍ଗଳବାର ସକାଳେ ସେ ଘରୁ ବାଇକରେ ଆସି ନାକଚଣା ଦ୍ୱାର ନିକଟରେ ଠିଆ ହୋଇଥିଲେ । ଏହି ସମୟରେ ବିପରୀତ ଦିଗରୁ ଏକ ବାଇକରେ ୩ ଜଣ ଯୁବକ ଆସି ଅତର୍କିତ ଭାବେ ତାଙ୍କ ଉପରକୁ ୩ ରାଉଣ୍ଡ ଗୁଳିମାଡ କରିଥିଲେ।