ବାଂଲାଦେଶର ଦୁଇଟି ସ୍ଥାନ ରଙ୍ଗପୁର ଏବଂ କୁଷ୍ଟିଆ ଜିଲ୍ଲାରେ ଶନିବାର ପୁଣି ଘଟିଛି ହିଂସା । ଏହି ଆକ୍ରମଣରେ ଜଣେ ଧର୍ମଗୁରୁଙ୍କୁ ହତ୍ୟା କରାଯିବା ସହ ହିନ୍ଦୁ ସମ୍ପ୍ରଦାୟର ଘର ଏବଂ ଦୋକାନଗୁଡ଼ିକୁ ଟାର୍ଗେଟ କରାଯାଇଛି। ରଙ୍ଗପୁରର ଦାସପଡ଼ା ବଜାର ଅଞ୍ଚଳରେ ଜଣେ ମୁସଲିମ ଯୁବକ ରାକିବ ହାସନଙ୍କ ହତ୍ୟା ପରେ ଭିଡ଼ରେ ଥିବା ଲୋକେ ହିନ୍ଦୁମାନଙ୍କ ଘର ଏବଂ ଦୋକାନଗୁଡ଼ିକୁ ଭଙ୍ଗାରୁଜା କରିଥିଲେ। ପୋଲିସ ସୂଚନା ଅନୁଯାୟୀ ତଦନ୍ତକୁ ଭଣ୍ଡୁର କରିବା ପାଇଁ ଏକ ତୃତୀୟ ପକ୍ଷ ଦ୍ୱାରା ଏହି ଆକ୍ରମଣ କରାଯାଇଥିଲା। ମୃତକଙ୍କ ମାଆ ସ୍ପଷ୍ଟ କରିଛନ୍ତି ଯେ ହତ୍ୟାକାଣ୍ଡରେ ହିନ୍ଦୁ ସମ୍ପ୍ରଦାୟର କୌଣସି ସମ୍ପୃକ୍ତି ନାହିଁ। ବ୍ୟକ୍ତିଗତ ବିବାଦ ଯୋଗୁଁ ନିଶା କାରବାରକାରୀ ମହମ୍ମଦ ମୋମିନଙ୍କ ଦ୍ୱାରା ରାକିବଙ୍କୁ ହତ୍ୟା କରାଯାଇଥିଲା। ଦ୍ୱିତୀୟ ଘଟଣା ହେଲା, କୁଷ୍ଟିଆରେ ଏକ ଭିଡ଼ରେ ଥିବା ଲୋକେ ସ୍କୁଲ ଶିକ୍ଷକ ଏବଂ ଧର୍ମଗୁରୁ ଶାମିମ ରେଜା ଜାହାଙ୍ଗୀରଙ୍କୁ ଇସଲାମକୁ ଅପମାନିତ କରିବାର ଅଭିଯୋଗ ଆଣି ହତ୍ୟା କରିଥିଲା। ଆକ୍ରମଣକାରୀମାନେ ତାଙ୍କ ଘର ଜାଳି ଦେଇଥିଲେ ଏବଂ ତାଙ୍କର ସାତ ଜଣ ଅନୁଗାମୀଙ୍କୁ ଗୁରୁତର ଆହତ କରିଥିଲେ।ଏଠାରେ ମଧ୍ୟ କିଛି ହିନ୍ଦୁ ଘରକୁ ଟାର୍ଗେଟ କରାଯାଇଥିଲା। ବାଂଲାଦେଶ ହିନ୍ଦୁ ବୌଦ୍ଧ ଖ୍ରୀଷ୍ଟିଆନ ୟୁନିଟି କାଉନସିଲରଙ୍କ ତଥ୍ୟ ଅନୁଯାୟୀ, କେବଳ ଚଳିତ ବର୍ଷର ପ୍ରଥମ ତିନି ମାସରେ ୧୩୩ଟି ସାମ୍ପ୍ରଦାୟିକ ହିଂସା ଘଟଣା ରେକର୍ଡ କରାଯାଇଛି ଏବଂ ବର୍ତ୍ତମାନର ପରିସ୍ଥିତିର ମୁକାବିଲା ପାଇଁ ପ୍ରଭାବିତ ଅଞ୍ଚଳରେ ପୋଲିସ ଫୋର୍ସ ଏବଂ ରାପିଡ୍ ଆକ୍ସନ୍ ବାଟାଲିୟନକୁ ନିୟୋଜିତ କରାଯାଇଛି।
