ଭୁବନେଶ୍ୱର:ଓଡ଼ିଶା ବିଧାନସଭାର ବିଧାୟିକା ଓ ବିଧାୟକଙ୍କୁ ବିଧାନସଭାର ବିଧି ସଂପର୍କରେ ଦିଆଯିବ ପ୍ରଶିକ୍ଷଣ । ଏଥିପାଇଁ ବିଧାନସଭାରେ ସ୍ବତନ୍ତ୍ର କାର୍ଯ୍ୟକ୍ରମ ଆଯୋଜନ ହେଉଛି ।ତିନୋଟି ସେସନରେ ହେବାକୁ ଥିବା ପ୍ରଶିକ୍ଷଣ କାର୍ଯ୍ଯକ୍ରମର ଉଦ୍ ଘାଟନୀ ଅଧିବେଶନରେ ଉପରାଷ୍ଟ୍ରପତି ବିଧାୟକ ଓ ବିଧାୟିକା ମାନଙ୍କୁ ବିଧାନସଭାର ବିଧି ସଂପର୍କରେ ମାର୍ଗଦର୍ଶନ ଦେବେ । ଏଥିରେ ସଂସଦୀୟ ବ୍ୟବସ୍ଥା ଓ କିମିଟି କାର୍ଯ୍ୟ ସଂପର୍କରେ ଆଲୋଚନା ହେବ । ଏହାସହ ବଜେଟ ଉପସ୍ଥାପନ ବିଧି ବିଧାନ ସଂପର୍କରେ ବିଧାୟକ ମାନଙ୍କୁ ଟ୍ରେନିଂ ଦିଆଯିବ । ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମଧ୍ଯ ଉପସ୍ଥିତ ରହିବେ ।ପରେ ୧୮ ତାରିଖରୁ ଆରମ୍ଭ ହେବାକୁ ଥିବା ଶୀତ ଅଧିବେଶନ ଲାଗି ୧୭ ତାରିଖରେ ସର୍ବଦଳୀୟ ବୈଠକ ବସିବ ।ହେଲେ ଏହି ଶିବିରରେ ଯୋଗ ଦେବେ ନାହିଁ ବୋଲି ପୂର୍ବରୁ ସ୍ପଷ୍ଟ କରି ସାରିଛନ୍ତି ରାଜ୍ୟ କଂଗ୍ରେସ ସଭାପତି ଭକ୍ତ ଦାସ। ଏହି ଶିବିରକୁ ବୟକଟ କରିବାକୁ ସେ ବିଜେଡିକୁ ମଧ୍ୟ ଆହ୍ଵାନ ଦେଇଥିଲେ। ଏଥିରେ ଯୋଗ ଦେବା ନେଇ ନିଜର ଆଭିମୁଖ୍ୟ ସ୍ପଷ୍ଟ କରିଛନ୍ତି ବିଜେଡି ବିଧାୟକ ଅରୁଣ ସାହୁ। ତାଙ୍କ କହିବା ଅନୁସାରେ, ଏହା କୌଣସି ଦଳୀୟ ନିଷ୍ପତ୍ତି ନୁହେଁ। ବରଂ ବିଧାୟକମାନଙ୍କୁ ବ୍ୟକ୍ତିଗତ ଭାବେ ନିମନ୍ତ୍ରଣ କରାଯାଇଛି। ତେଣୁ ଶିବିରକୁ ଯିବେ କି ନାହିଁ, ସେ ନିଜେ ନିଷ୍ପତ୍ତି ନେବେ ବୋଲି କହିଛନ୍ତି।ପ୍ରଶିକ୍ଷଣ ଶିବିରର ଆବଶ୍ୟକତାକୁ ନେଇ ମଧ୍ୟ ପ୍ରଶ୍ନ ଉଠାଇଛନ୍ତି ଅରୁଣ ସାହୁ। ବର୍ତ୍ତମାନର ବିଧାନସଭା କାର୍ଯ୍ୟକାଳର ଅଢ଼େଇ ବର୍ଷ ପୂରିବା ପରେ ପୁଣି ଥରେ ବିଧାୟକମାନଙ୍କ ପାଇଁ ପ୍ରଶିକ୍ଷଣର ଆବଶ୍ୟକତା କାହିଁକି ପଡ଼ିଲା ବୋଲି ସେ ପ୍ରଶ୍ନ କରିଛନ୍ତି। ବିଧାନସଭା ଠିକ୍ ଭାବେ ଚାଲୁନାହିଁ କି, ମନ୍ତ୍ରୀମାନଙ୍କ କାର୍ଯ୍ୟଧାରାରେ ତ୍ରୁଟି ରହୁଛି କି, ଯେଉଁଥିପାଇଁ ଏଭଳି ପ୍ରଶିକ୍ଷଣ ଶିବିର ଆୟୋଜନ କରିବାକୁ ପଡ଼ୁଛି ବୋଲି ସେ ଆଶ୍ଚର୍ଯ୍ୟ ପ୍ରକାଶ କରିଛନ୍ତି।
