ଆଜି ରାଜ୍ୟ କ୍ୟାବିନେଟ ବୈଠକରେ ୧୧ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ମୋହର ଲାଗିଛି। ଏଥିରେ ଜଳ ସମ୍ପଦ, ପରିବହନ ଓ ଗ୍ରାମ୍ୟ ପାନୀୟ ଜଳ ବିଭାଗକୁ ବିଶେଷ ଗୁରୁତ୍ୱ ଦିଆଯାଇଛି। ବୈଠକ ପରେ ମୁଖ୍ୟ ଶାସନ ସଚିବ ଅନୁ ଗର୍ଗ ଏହି ସୂଚନା ଦେଇଛନ୍ତି। ୩୪୦୦ କୋଟି ଟଙ୍କାର ‘ଅଟଳ ବସଷ୍ଟାଣ୍ଡ ଯୋଜନା’ କ୍ୟାବିନେଟ ଅନୁମୋଦନ ପାଇଛି। ଏହି ଯୋଜନାରେ ରାଜ୍ୟର ୩୧୮ଟି ବସଷ୍ଟାଣ୍ଡର ଉନ୍ନତୀକରଣ ହେବ ଏବଂ ଏହାକୁ OSRTC ସମନ୍ୱୟରେ କାର୍ଯ୍ୟକାରୀ କରାଯିବ। ଯାତ୍ରୀ ସୁବିଧା ବୃଦ୍ଧି ଓ ଆଧୁନିକ ପରିବହନ ବ୍ୟବସ୍ଥା ପାଇଁ ଏହାକୁ ବଡ଼ ପଦକ୍ଷେପ ଭାବେ ଦେଖାଯାଉଛି।
ଏହାପରେ ଜଳ ସମ୍ପଦ ବିଭାଗର ୫ଟି ମୁଖ୍ୟ ପ୍ରକଳ୍ପକୁ ମଞ୍ଜୁରୀ ମିଳିଛି। ସେଥିରେ ପାର୍ବତୀଗିରି ମେଗା ଲିଫ୍ଟ ଜଳସେଚନ ପ୍ରକଳ୍ପକୁ ଗୁରୁତ୍ୱ ଦିଆଯାଇଛି, ଯାହା ଦ୍ୱାରା ସମ୍ବଲପୁରରେ ପ୍ରାୟ ୬୨୧୦ ହେକ୍ଟର ଜମି ଜଳସେଚିତ ହେବ ଓ ୧୪ଟି ଗାଁ ଉପକୃତ ହେବେ। କଟକର ହାଡୁଆ ପ୍ରକଳ୍ପ, ସୋନପୁର ତେଲ ନଦୀ କ୍ଲଷ୍ଟର, ଯାଜପୁରର ଖରାସୁଆ-ବ୍ରାହ୍ମଣୀ ପ୍ରକଳ୍ପ ଏବଂ କେନ୍ଦୁଝରର ବିଭିନ୍ନ କ୍ଲଷ୍ଟର ପ୍ରକଳ୍ପ ମାଧ୍ୟମରେ ହଜାର ହେକ୍ଟର ଜମିକୁ ପାଣି ମିଳିବ। ଏହା ସହିତ, କେନ୍ଦୁଝରରେ ୧୬୪୭ କୋଟି ଟଙ୍କା ବ୍ୟୟରେ ନୂଆ 2×500 MVA ସବ୍-ଷ୍ଟେସନ ସ୍ଥାପନ ପାଇଁ ମଞ୍ଜୁରୀ ମିଳିଛି ।ଏହା ୩ ବର୍ଷ ମଧ୍ୟରେ ସମ୍ପୂର୍ଣ୍ଣ ହେବ। ଶ୍ରମ ବିଭାଗର ୩ଟି ପ୍ରସ୍ତାବ ଚାକିରୀ ସର୍ତ୍ତ ସଂଶୋଧନ ଓ କ୍ୟାଡର ନିୟମ ପରିବର୍ତ୍ତନ ମଧ୍ୟ ପାରିତ ହୋଇଛି। ଗ୍ରାମ୍ୟ ପାନୀୟ ଜଳ ଯୋଗାଣ ପରିଚାଳନା ଓ ରକ୍ଷଣାବେକ୍ଷଣା ନୀତି ୨୦୨୬କୁ କ୍ୟାବିନେଟ ଅନୁମୋଦନ ଦେଇଛି। ଏହି ନୀତି ଅନୁଯାୟୀ ପ୍ରକଳ୍ପ ସମାପ୍ତି ପରେ ତାହାର ପରିଚାଳନାରେ ପଞ୍ଚାୟତ ଓ ଗ୍ରାମବାସୀଙ୍କ ଭୂମିକା ସ୍ପଷ୍ଟ କରାଯାଇଛି।
